قلشات احتجاجية.. فى المسألة المرورية

* مصر هى أمى.. والدائرى حرق دمى.

*معاكم من قلب الأحداث: كلب ماشى وراه عشرين خروف يقطعون الطريق الدائرى بالعرض بمنتهى الأريحية...وكان صاحبهم ذو الثلاث عشر ربيعا – بالكتير- بانتظارهم ع "اليمة" التانية ...وقد هتفنا كلنا من قلبنا وبقنا من وراء دريكسيوناتنا "راجل يا حسام"... للكلب طبعا!

*ومن موقعى هذا ...أنصح الفنان أحمد عدوية بالتزام بيته حبة كده ..لأنه لو شاف اللى انا شايفاه ع المحور كان فكّر كتير قبل ما يغنى زحمة ...زحمة؟؟؟ ف نص التمانينات؟؟؟أمال ده إيه ؟؟؟ معجنة ؟؟؟

*استمع فى حنان مبالغ فيه لرائعة الدلوعة شادية "أصله معداش على مصر ..." وأهمس لنفسى فى دلال ..والنبى ولو كان عدى يا اوختى مكانش شاف حاجة برضه ...التراب حاجب الرؤية ....بوووووم !!

*قالك "يا وابور الساعة 12 ياللى مجبّل ع الصَعيد..."، احياة أبوك خليها 12 ونص واحدة على ما اكتب وصيتى واخلّص للعيال ورق المعاش.

*ولا أى "سوق بينا يا اسطى على الكورنيش "ولا أى "درة" ولا "مانجا" الكورنيش اللى حيلتى بااااااظ ...بااااااظ.

*حزام الأمان ...لا بيحل ولا بيربط...بس لو قابلتك لجنة ..هايظبط !

*لو رايح العجوزة من ميدان سفنكس.. لقيت نفسك فى الزمالك بقوة الدفع وبعدين فى الجيزة بقوة الرفع..وبعدين فى شارع مراد تانى عشان تهرب من الزحمة ..وفضلت ساحب وانت مش حاسس لحد الدقى ولفيت من شارع التحرير عشان ترمى نفسك فى النيل من أول الجلاء ...لقيت نفسك بقيت فى العجوزة ..يبقى أنت أكيد..أكيد..أكيد ف مصر يا معلم.

*قالك "وقد توقفت حركة السير فى شارع الهرم فى أحداث الشغب الأخيرة لمدة نصف ساعة"...قالك "نصف"...طب وانا كمواطن انبسطت ..وبنهيب بالسادة المسئولين تنظيم دورات شغب رمضانية لسائقى الموكروباظ- آخر حاجة -والتوقتوق علشان شارع الهرم يحافظ على استقراره ويقف نص ساعة ب"س" كل يوم .قالك "نصف".

*يذكرنى نظام المرور فى بلادى والالتزام منقطع النظير من زملائى المواطنين سائقين وركاب ومعديين فى الشارع وعابرى سبيل ولجان مرورية بالمقولة العميقة الأثر والمعنى لخالد الذكر (كركر).."حلابؤة حلابؤة !!"

*"نيجى هنا يقولولنا هناك..وهناك يقولولنا هنا ...ع الحال ده بقالنا سنة"..يبدو أن الأستاذ حكيم كان بيجدد الرخصة ..زيى !

*مشكلتى مع المرور لا تقل عمقا ولا أهمية عن مشكلة كتكوت أبوالليل مع الفخايدة .."يا إما أجعد فى البيت وأموت ..يا إما أخرج وانجتل..يا إما اطلع ع "الدائرى" واتوفى"..

*من النهاردة مفيش رادار ...أنا الرادار ..أنا الراداااار !

*قالك "أصلها بتفرق من لجنة للجنة .. فيه لجنة تنساها بغرزة ..ولجنة ..مابتتنسييييييش"

*وقالوها فى الأمثال "ورب لجنة خير من ألف كمين".

* وكما قال الشاعر "لجنة يا لجنة وليلتنا طين يا لجنة".
ودمتم محاصرين