إنجي عبد الله تؤكد لجمهورها عدم إصابتها بالسرطان
سادت حالة من الارتياح والفرحة لدى جمهور الفنانة إنجي عبد الله، الممثلة وملكة جمال مصر السابقة، بعد أن طمأنتهم على حالتها الصحية وإن ما كانت تعتقد أنه ورم خبيث في المخ، أظهرت الفحوصات التي أجرتها في طوكيو باليابان أنه ورم حميد، وأن حجم الورم لم يتغير منذ شهرين.
حيث كتبت إنجي على صفحتها الرسمية بفيس بوك أثناء تواجدها في اليابان "أنا الحمد لله كويسه ومبسوطه أوى علشان عرفت أن الورم الحمد لله مش خبيث، أنا عملت فحوصات كتير هنا في اليابان واللي اتأكدت منه دلوقتى انه مش خبيث لأن حجم الورم متغيرش من شهرين، وفي احتمالات تانية كتير، أنه يكون فيروس أو إنفكشن، بس هعرف النتيجة النهائيه كمان أسبوع، أنا دخلت المستشفى لمدة أسبوع عملت فحوصات كتير على المخ، وعينة من النخاع الشوكى، والله العظيم كل الدكاتره اللي متابعين حالتي هنا مذهولين، في الاشعات باين حجم ورم وكبير في مكان خطر هو جزع المخ اللي ميقدروش يخدوا عينه منه لأنه في مكان خطر، بس أنا معنديش أي أعراض خارجية غير لما أمشي لمدة طويلة بفقد الإحساس برجلي وأحيانا بشوف كل حاجه قدامي اتنين، وهما مش عارفين ازاى ده ممكن يحصل، وفعلا شايفني حالة غريبة، لأن الأعراض اللي عندي حاجة بسيطة قدام الاشعات اللي شايفنها، بس هقول الحمد لله أن الدعا اللي اتدعالي من كل الناس اللى نحوا أهلي وأصحابي مسلمين ومسحيين وحتى بوذين هنا من أصحابي في اليابان، والحب والخوف اللي شفته من الناس عليا وحتى جوزي اللي ربنا اكرمني بيه ووقف جمبي وكان بيراسل أكبر مستشفيات في لندن وأمريكا لحد الفجر هنا علشان فرق التوقيت بينا.
وقالت إنجي "حسيت أنا أد إيه محظوظة ومكنش فارق معايا إيه ممكن يحصلي كفاية إني شفت الحب ده من كل اللي حواليا، وساعتها كنت بفكر أنه خلاص كلها شويه وقت مش أكتر، بس كنت سعيدة وعمري حتى ما عيطت مرة، قلت كلنا لينا وقت وأنا ممكن وقتي جه، بس كفايه إني كنت محظوظة وشفت حب الناس وأد إيه دي نعمة، بس الحمد لله أنا كويسه وفى أمل كبير أوى دلوقتى إنها تطلع حاةه ممكن تتعالج، أنا فعلًا بشكر كل اللي حواليا وحاسه أن كل الدعا اللي اتدعالى فرق كتير وعندي إيمان أن ممكن يكون غير من حاجة وحشة كانت هتحصلي، بجد شكرا من قلبي وربنا يحميكوا لأهلكوا وكل الناس اللي بيحبوكوا وبتحبوهم.شكرا".
وعلقت إيمان أبو زيد "الحمد لله رب العالمين والله دعتلك يا انجي وماما دعتلك ربنا يتم شفاكي على ألف خير بجد فرحتيني بارب تشوفي كل الخير ومتشوفيش أي حاجة وحشة بجد الحمد لله".
وقالت نجاح بكر "الحمد لله يا إنجي وأنا من فترة قولتلك ما تقلقيش لأنها حصلت قبل كدا مع صديق".
وأضافت نسرين فهيم "أحلي خبر يا حبيبتي ربنا يطمنك عليكي ويكون في عونك إن شاء الله وتقومي بألف سلامة"
وعلق محمود السامولي "إن شاء الله ربنا يبعد عنك كل شر يا انجى واعتبرى دا امتحان ورفع درجات عند ربنا وقادر يشفيكى يارب لانك إنسانة طيية ومحترمة (وعسى أن تكرهوا شئ وهو خير لكم) ربنا يعيفكى يارب".
وتابع وائل إبراهيم "ربنا يعفي عنك وإن شاء الله خير وتطلع حاجة بسيطة خليكي قوية ودايما خليكي متفائلة ومعنوياتك عالية دي حاجة مهمة جدا وأن شاء الله خير"
ويذكر أن إنجي عبد الله كانت قد كشفت في شهر فبراير 2016 عن إصابتها بمرض سرطان المخ، وأكدت أنها وصلت إلى مرحلة صعبة من المرض يصعب شفاؤها.
كما أثارت جدلًا واسعًا في الصيف الماضي، بزواجها من دبلوماسي تركي، القائم بأعمال السفير التركي ألبر بوسوتر، وذهابها للعيش في تركيا.
