اشتعال المنافسة بين جمهور محمد حماقي في مسابقته على «فيس بوك»
يتواصل الفنان محمد حماقي بشكل دائم مع جمهوره ومحبيه وبناءً على رغبة جمهوره قرر أن يقيم مسابقة لهم عبر صفحته الشخصية على موقع التواصل الاجتماعي "فيس بوك".
وقالت الصفحة الرسمية له على "فيس بوك": "باقي ساعة على بداية مسابقة حماقي 2016 التي أعلن عنها اليومين اللي فاتوا هنا على الصفحة، يا ريت كل اللي مستنيين المسابقة يقرأوا النقاط دي".
وأضافت الصفحة أن النقاط هي:"المسابقة دي معمولة بناءً على طلبكوا، ودي الطريقة اللي انتوا اقترحتوها عشان نقدر من خلالها نختار الناس اللي هتقابل حماقي وتقضي يوم مميز معاه، لكن احنا مقدرين إن في جزء كبير من جمهور حماقي خارج مصر أو بعيد عن القاهرة أو عنده عقبات تمنعه من حضور المقابلة دي، واستقبلنا كل اقتراحاتكوا بخصوصهم وهندرس إمكانية تنفيذها خلال الفترة اللي جاية إن شاء الله".
وتابعت: "الأسئلة هتكون كل ساعة بالظبط ابتداءً من الساعة 1 الظهر (بتوقيت القاهرة) لحد الساعة 10 بالليل، يعني السؤال الأول الساعة 1 والسؤال التاني الساعة 2، وهكذا".
وقالت: "غير مسموح تمامًا بتعديل الإجابات أو كتابة أكتر من كومنت على نفس البوست، لو عندك غلطة كتابية خليها زي ما هي وإحنا هنراعي وهنحسب إن إجابتك صحيحة".
وأضافت:" يا ريت الإجابة تكون واضحة وصريحة (منعًا لأي خلاف على مدى صحة الإجابة)، يعني لو كتبنا مثلًا إننا عايزين أسماء 3 أغاني من ألبوم معين فيا ريت الإجابة تكون بأسماء 3 أغاني بس، لو كتبت 2 مش هنديلك جزء من الدرجة، ولو كتبت 4 هتعتبر الإجابة خاطئة حتى لو كانوا الـ4 كلهم صح".
وقالت:"معظم الأسئلة هتكون صعبة (بناءً على رغبتكم) عشان اللي متابع وعارف كل المعلومات عن حماقي وأعماله الفنية هو اللي يلحق يجاوب، لإننا لو خلينا الأسئلة سهلة وأي حد عارف إجاباتها كده اللي هيكسبوا هيكونوا أصحاب الإجابات الأسرع، مش اللي مهتمين بجد ومتابعين كل حاجة وعندهم كل المعلومات، واحنا برضه راعينا إن الأسئلة ماتكونش كلها صعبة (بناءاّ على رغبة بعضكم)".
وأضافت:"مقابلة حماقي مع الفايزين هتكون في القاهرة يوم الخميس (24-03-2016) إن شاء الله، فيا ريت اللي يشارك في المسابقة يكون المكان والمعاد مناسبين ليه".
وتابعت:"احنا حددنا عدد الفايزين وخليناهم 10 بس (بناءً على رغبتكم) عشان لو العدد كان كبير ده هيقلل من فرصة كل واحد في إنه يتكلم مع حماقي براحته، لكن العدد ده هيتيح الفرصة إن كل واحد من الفايزين يتكلم مع حماقي براحته ويقول كل اللي نفسه فيه".
