سلوكياتنا من أخلاقنا

كتير مننا أقصد كمواطنين بيستخدم مترو الأنفاق كوسيلة أكثر سهولة وسرعة للانتقال إلى الأشغال والأعمال والفسح والخروجات وعشان كده المترو دايما بيكون زحمة جدا وبالرغم من أننا كمواطنين عارفين الحقيقة دى وعايشنها ومتعايشين معاها بشكل يومى ومتعودين عليها إلا أن نفس المواقف ونفس ردود الأفعال تجاهها بنشوفها كل يوم.

عندك مثلا الناس قبل ما المترو يوصل رصيف المحطة يا سلام تشوفهم زى عصافير الكنارى هاديين خاااااالص بس أوعى تنخدع من المنظر ده عشان ده الهدوء الذي يسبق العاصفة وأول ما المترو يدخل رصيف المحطة عينك ما تشوف إلا النور تتحول هذه العصافير الكنارى إلى زومبى بقدرة قادر زحام وزق وكعبلة وضرب ده كوم والتفاهات كوم تانى "اوعى ايدك، انت دوست على رجلى، شيل كوعك" هو احنا كمواطنين مش عارفين قبل ما ننزل من بيوتنا أن في ناس زينا رايحه شغلها وطلبة مدارس وغيره وغيره وان المترو هيكون زحمه يبقى مبنستحملش بعض ليه؟ ومبنحترمش بعض ليه ؟ أفتكر لو اهتم كل واحد فينا بتحسين أخلاقه هتتحسن سلوكياته.