شقيقة ميرهان حسين: أختي اتهانت ورشوها بالبول في القسم
حكت نادين حسين بسيوني، شقيقة الفنانة ميرهان حسين، عن واقعة الاعتداء على شقيقتها قائلة إن ضباط الكمين أهانوا شقيقتي، مؤكدة أن السبب في شتمها لضابط الكمين يرجع إلى أن الضابط قام بضرب شقيقتها على صدرها، طالبًا منها النزول من السيارة، وعندما رفضت قام بصفعها على وجهها.
وقالت نادين إن ضباط الكمين لفقوا محضر سكر لشقيقتها، وإنها تعرضت للضرب في القسم وتم سكب جردل من البول عليها.
وأضافت نادين على صفحتها الرسمية بفيس بوك "أختى اتهانت ظلم يا بلد الأمن والأمان، البلد اللي له حق فيها مبيجيش، أختى راجعة من التصوير الفجر (طبيعة شغلها كدة)، وقفها كمين والظابط عادى طلب رخص وقالها اقفى في جمب فطلعتله الرخص ووقعت من إيده بعد ما أخدها ونزل يجيبها في نفس اللحظة وهي بتتحرك خبطته بالمراية في إيده، ازاى دا يحصل! قام مدخل ايده يشد المفتاح وخبطها ف صدرها وقالها انزلى طبعًا ارتبكت ورفضت تنزل فضربها بالقلم ورد فعل طبيعي منها شتمته ولما لقاها بتشتمه كده جاب واحد يصور من أول ما شتمت.
واستكملت طب هو في حد هيشتم كده من غير فعل يدفع لده؟ فيلبسوها محضر سكر مع العلم أن ميرهان مبتشربش، وفي دكتور كشف عليها وقال أن هي في قمة اتزانها، لكن طبعا لازم الكلام يتحرف ويتغير عشان موقف الظباط يبقى سليم، بس اللي معملوش حسابه أن ربنا مبيظلمش وإن في فيديو وهي منهارة وبتقول (رجالة مصريين بيضربوا بنت مصرية) وطبعًا ده سبب انهم ياخدوها القسم وهناك اتعرضت لأقذر المعاملة واتضربت واتهانت ورشوها ببول وميه هي والمساعدة بتاعتها وكل آثار الضرب واضحة.. ومش أول مرة نسمع عن الظباط اللي كدة وحاجات من النوع ده، بس فعلًا اللي بنشوفه في الأفلام قليل على اللي اتعمل فيها.. متضامنة مع مريهان".
