بالفيديو.. سهير البابلي لـ«100سؤال»: أؤيد تولي العسكريين لجميع المناصب.. مرسي مبيعرفش يتكلم ومش فاهم حاجات كتير.. أرفض التكفير ومينفعش نبقى ضد ربنا.. ولازم يتعمل في المتحرشين زي اللى بيعملوه

حلت الفنانة سهير البابلي، ضيفة على الإعلامية راغدة شلهوب، ببرنامج «100 سؤال»، المذاع عبر فضائية «الحياة»، للكشف عن رأيها في العديد من القضايا، والأسرار خلال مشوارها الفني.

المناصب للعسكريين

وقالت الفنانة سهير البابلي: «أنا مع تولي العسكريين كل المناصب القيادية في الدولة، وعلى فكرة ساعات بيغلطو لكن هم الأصلح».

وأضافت: «لازم كل مسئول ينزل الشارع ويشوف بعنيه المشكلات اللي بتعاني منها الناس، والله يكون في عون السيسي على حل مشكلات البلد».

قضية التكفير

وقالت: «أرفض تكفير أصحاب الديانات الأخرى لأن كل الناس خلق الله ومينفعش نبقى ضد ربنا حساب الناس كلها عند الله وأنا بحب الناس كلها ومينفعش نقول لبعض أنت مسلم ولا مسيحي لازم نتعامل مع بعض كلنا بالحب».

التحرش

وتابعت: «ظهور التحرش نتيجة لقلة الأدب وقلة التربية، والمتحرشين دول ولاد (...).. واللي يتحرش بأي بنت يبقا حقير».

وأضافت: «أنا عايزة أشوف أي متحرش كدا ويقولي يرضى يتعمل في أمه كدا في الشارع زي ما هو عمال يعمل في بنات الناس المتحرشين دول هيدخلوا نار جهنم وإحنا لازم نعلقهم في الشارع ونعمل فيهم اللي بيعملوه في بنات الناس».

سعاد حسني وعبدالحليم

وقالت: «إن سعاد حسني والعندليب عبد الحليم حافظ أصدقاء ولم يتزوجا.. واللي يقول إنهم تزوجا يبقى غلطان، واللي مفيد فوزي قاله بأنهم اتجوزوا غلط.. إلا إذا كانوا اتجوزو في السر وأنت بس اللي تعرف».

تميم وأردوغان

وقالت: «تميم أمير قطر ده ربنا يهديه بسبب اللي بيعمله في الناس وفي البلاد اللي نحوه، وأردوغان بتاع تركيا ده هو كمان ربنا يهديه، لازم كل حكام العالم يبقوا زي الرئيس السيسي رجل عقلاني وعفيف اللسان».

على جمعة

وأضافت: «أنا بحب الشيخ على جمعة وبحترمه جدًا وبحب أسمع منه أوي، وبحب الشيخ خالد الجندي وأسلوبه في تقديم المعلومات، مينفعش نقلل من قيمة الدكتور على جمعة ومينفعش نقارن أي حد بيه ممكن نقارن أي شخص بسهير البابلي مثلا لكن العلماء مينفعش نعمل ما بينهم مقارنة».

79 سنة

وقالت: «أنا مواليد سنة 1937 وعيد ميلادي كان أول إمبارح وبنتي عملتلي عيد ميد كان حلو جدًا مشوفتش حد بيكرهني طول سنين عمري كلها وبشكر كل اللي بيحبوني وأتمنى في عيد ميلادي ده أن مصر تبقى بخير في عهد السيسي وأتمنى يبقى عندي فلوس كتير لأني بحب أصرف كتير وبكره الفقر جدًا لأنه بيذل الناس».

مرسي وشفيق

وقالت: «قابلت محمد مرسي وكان كلامه غريب مبيعرفش يتكلم عن كل حاجة وفيه حاجات كتير مش فاهمها لكن السيسي بيعرف يتكلم عن كل حاجة وراجل بيحب مصر فعلا».

وأضافت: «الفريق أحمد شفيق كان راجل شيك وكل الناس كانت بتحبه واتمنيت إنه يفوز أمام مرسي في الانتخابات».

الشعراوي والحجاب

وقالت: «لبست الحجاب لأني كنت خايفة وبنتي كانت محجبة واتكسفت من نفسي لما لاقيتها لابسة حجاب وبتدرس القرآن وأنا مش محجبة».

وأضافت:«الشيخ الشعراوي سبب ارتدائي للحجاب لأني ذهبت له وسألته عدم ارتداء الحجاب حرام ولا لأ، وقالي حرام وفي ساعتها لبست الحجاب».