بالصور.. رواد «فيس بوك» يحكون ذكريات الحب الأول.. منة: «حبيت مدرس الحساب».. محمود: «فضلت زين الدين زيدان عليا».. نورا: «ماما قفشتنى معاه وكلت علقة عنب».. ومحمد:

دشن مستخدمو موقع التواصل الاجتماعى «فيس بوك»، هاشتاجًا بعنوان «احكيلنا عن أول حب في حياتك»، والذي شارك فيه أكثر من 43 ألف شخص، يروى بعضهم ذكريات الحب الأول بمناسبة عيد الحب.

تحدث المشاركون في الحدث عن الحب الأول وكان حب أولى ابتدائي هو المسيطر على الموقف، بارزين بساطته ونقاء مشاعره، ونرصد أبرز مواقف النشطاء.

سرقة الساندوتشات
قال أحمد: "كنت بحب وحداة في ابتدائي.. كنت يوميا أسرق السندوتشات بتاعتها".

حب مدرس الحساب
وأضافت منون: "كنت موهومة بمدرس حساب كان بيدخلنا احتياطي بس في أولى ابتدائي.. كان شبه عبدالحليم جدًا وشخصيته كانت قوية أوي وفي نفس الوقت بيقلب طفل مع البنات الصغيرة والقوة اللى في شخصيته دي كانت بتختفي فجأة.. كانت بتظهر فيه حنية غريبة معاهم".

وتابعت: "وكنت بكتبله جوابات في كشكولي وأقوله فيها متحاولش تدور عليا وتعرف أنا في فصل كام عشان مش هقولك إني في أولى أول، ومرة قفشني وأنا بكتبله جواب في حصته وقراه وانا مت من العياط.. رد فعله كان كله احترام للمشاعر دي والله، كنت هبلة أوي فحبي الصامت ليه وفضلت لإعدادي أفتكره.. كان عظيم".

وقال محمد: "بوسي.. أم شعر سايح وديل حصان.. بعد ما كبرنا اكتشفت أن مش أنا بس.. دا الـ3 فصول بتوع أولى ابتدائي بيحبوها".

إنت مش تخين يا حبيبي
وأضاف محمود: "يااااه على أول حب.. كل خروجتنا كانت في كنتاكي وجاد وفضلت تقولى انت مش تخين ياحبيبي وأنا انبسط وآكل واتخن أبصلها تقولى مش تخين ياحبيبي لحد ما طالعلى كرش ومبقتش عارف أخس.. منك لله يابعيدة.. أخس إزاي أنا دلوقتي".

بتحب زين الدين زيدان
وقال محمود عبدالرحمن: "أنا في رابعة ابتدائي حبيتها وبعد امتحان الخط العربي في الترم التاني قررت إني أصارحها، بصراحة هي كانت شيك فربطة الفيونكة بالضفيرة، المهم رحت كلمتها طلعت مأنتمة وطلعتلي صورة زين الدين زيدان، وقالتلي مش بحب ولا أحب إيه وانا السنة الجاية مسافرة فرنسا مع بابا عشان أتفرج على كأس العالم.. يااااه كسرت نفسي.. بقيت أحلق شعري دايما زيروو عشان ألفت نظرها إنى ممكن أتغير".

دافع عنى عشان أوزعة
وأضافت نورا: "كنت في تالتة ابتدائي ولسه أوزعة والعيال كانوا بيعايروني.. وكان عليا تسريحة شعر مضحكة جدا.. وهو الوحيد اللي حس بالجمال الكامن خلف الضفاير البشعة اللى ماما كانت بتعملهالى.. المهم فضل كتير ياعيني يقاوم سحر خدودى المكلبظة وكان بيزعق للعيال للي بيقولى يا أوزعة.. ماما جت تاخدنى من المدرسة مرة لقيته قاعد معايا بقي بيحرسني ولما روحنا راحت ساكعاني علقة عنب".

وتابعت: "وتاني يوم قولتله أنا مش هاينفع أكلمك عشان ماما هاتلسوعني واتفقنا إني هاستناه بقى لحد ما نخلص الابتدائية وندخل إعدادية مشتركة ونحقق حلمنا.. وأول ما دخلت سنة رابعة كنت أنا طولت هو فضل قصير زي ما هو.. اضطريت أمحى العلاقة دى من حياتي أساسا.. وبس بقى".

المكرونة والمحشي
وقال أحمد: "صينية المكرونة بالباشميل ومحشي ورق العنب.. هو ده أيوة ده هو ده الحب الحقيقي".

حبيت صاحبتها وبقيت أتغدى عندهم
وأضاف محمد: "كنت في خامسة ابتدائى وكنت بحب بنت بس كانت تنكة.. وصاحبتها كانت بتحبني فحبيت صاحبتها وبقيت بتغدا عندهم كل يوم أربع قبل الدرس".