نفاد الطبعة الأولى من رواية «هاشتاج» لأحمد محمد بمعرض الكتاب
أعلنت دار المصري للنشر والتوزيع، عن نفاد الطبعة الأولى من رواية "هاشتاج" للكاتب أحمد محمد، مشيرة إلى أنه جار توفير الطبعة الثانية بجناح الدار في معرض القاهرة الدولي للكتاب بدورته السابعة والأربعين.
ومن أجواء الرواية:
بعد أن انتهى آدم من رسمته، أغلق الاسكتش ووضعه بجانبه وظلَّ ينظر للنيل منتظرًا شروق الشمس.
تفتكر هيحافظ على السر؟
كانت هذه الجملة صادرة من شاب يجلس بجوار آدم، ولكن لم يشعر به آدم إلا بعد سماع هذه الجملة.
فنظر له آدم باستغراب وأجاب في دهشة: أفندم ؟
بقولك تفتكر هيحفظ السر؟.. قالها الشاب دون النظر إلى آدم؛فكان ينظر إلى النيل وهو يبتسم.
فأجابه آدم:
هو مين ؟
فردَّ الشاب مسرعًا: " النيل "
ثم التفت إلى آدم ونظر له قبل أن يستكمل كلامه:
هو أنت فاكر أنت لوحدك اللي بتيجي تحكيله أسرارك؟
ظلَّ آدم صامتًا ينظر للشاب باستغراب.
فاستكمل الشاب حديثه قائلًا:
كلنا بنيجي وبنحكي للنيل وبنتكلم معاه بس يا ترى بقى هيحفظ السر، بصراحة أنا أشك مفيش حد دلوقتي بيحفظ السر،ناس قليلة أوي اللي ممكن تأمن لها على سرك والنيل ليه صحاب كتير ممكن يفضفض معاهم زي ما أنت ما بتفضفض معاه.
نهض الشاب وتقدَّم ناحية آدم ومدَّ يديه ليصافحه قائلًا:
هشام تقدر تناديني وتقولي يا اتش.
صافحه آدم قائلًا:
- وأنا آدم.. آدم عبد الرحمن.
- أقولك يا اتش برضو؟
ابتسم آدم لأول مرة من بداية الحديث فجلس هشام بجانبه ليستكمل حديثه معه.
