مرسي "العياط".. والشعب "الزّياط" !!

جاءنى صوته عبر هاتفى المحمول منفعلًا، منزعجًا، باكيًا، غاضبًا، ثائرًا.. لدرجة أنى لم استطع أن أميز بين كلماته ونحيبه.. فحاولت تهدئته.. لكن كل محاولاتى باءت بالفشل.. فطلبت منه أن يكف عن البكاء حتى أفهم منه ما يقول.. وسألته:

- فيه إيه يا مفعوص يا أبو نص لسان؟

- إثرائيل يا بابا لثه بتضرب فى "غزة".. هو مفيش حد قادر يوقف الدولة "الجربوعة" دى عند حدها؟

- متخفش يا مفعوص.. أكيد هيبقى فيه رد حاسم من القيادة السياسية بتاعتنا..

- هتقوللى هنرفض ونحتج، ونشجب ونندد ونثتنكر زى كل مرة.. إحنا زهقنا من النغمة دى.

- لأ يا حبيبى.. الريس "مرسى" سحب "السفير" بتاعنا من الكيان الصهيونى.. وطلب جلسة طارئة من خلال مندوبنا الدايم فى مجلس الأمن.. واستدعى سفير المجرمين.. وقدم احتجاجًا رسميًا عن طريقه لدولته الحقيرة.. ودى ضربة معلم.. ولطمة قوية لبنى صهيون.. والعرب فرحانين ومزأططين بالخطوة دى..

- يا ثلام.. ماهو "أبو علاء" المخلوع، برضو ثحب الثفير الإثرائيلى مرتين.. ولّا حضرتك مش فاكر..!!

- بس دلوقتى الوضع اختلف.. إحنا فى زمن الحرية.. والثوارت العربية.. وأكيد هيكون فيه رد حاسم، وقاطع، وقاسى مع القتلة المجرمين.

- أنت فاكر إثرائيل هبلة ومش عارفة الحاجات دى كلها.. أكيد عاملة حثابها، ومظبطة اللوبى بتاعها فى كل حتة.. وعارفة كمان إننا بنتكلم بث.. وبنطلع وننزل على "فشوش".. يعنى كل ده ملوش لازمة.. عشان إثرائيل مش بتعترف غير بلغة القوة والحرب والدم..

- لأ يا مفعوص.. إحنا المرة دى هنفضحهم فى مجلس الأمن.. وهـ"نجرسهم" فى كل حتة..!

- مجلث الأمن.. ابقى قابلنى.. يا بابا.. المجلث ده بتاعهم.. وأمريكا بتاعتهم.. والسلاح، اللى لو فكرنا نحاربهم بيه، بتاعهم كمان..!!

- يعنى مش عجبك الخطوات التصعيدية اللى خدها الرئيس "مرسى"؟!

- يا بابا.. دى حركات "منظرة" وشو إعلامى ودعاية "إخوانية" على جثث "الغزاويين".. لأن "مرثى العياط" عارف إن شعبنا "ظياط" بيحب "الزيطة" وعاوز يشبط فى أى حاجة والثلام..!!

- حرام عليك يا مفعوص.. إيه اللى خلاك تقول كده؟

- اللى مخلينى أقول كده إن "مرثى" بذات نفثه "متنحررشى" لما 5 من جنودنا ماتوا برثاث الجيش الإثرائيلى فى شهر أغثطث اللى فات.. ولما آلاف الشرفاء اتجمعوا أمام ثفارة تل أبيب؛ لطرد الثفير، والمطالبة بحق الشهدا، الإخوان وقتها اتهموا النشطاء بالعمالة والخيانة.. يبقى عندى حق ولا لأ؟!

- بس يا حبيبى فيه فرق بين الحادثين..!!

- يعنى فى دم أبناء "غزة" نثحب الثفير.. وفى دم جنودنا "المثريين" نعمل مش واخدين بالنا.. هو "مرثى" رئيثنا.. ولّا رئيث القطاع؟!... حرام والله يا بابا.. حراام.. حراااام.. حرااااااام..!!

- آلو.. آلو.. آلو..