«شبرا مصر» الفائز بجائزة «ساويرس» في معرض الكتاب
يشارك ديوان «شبرا مصر» للشاعرة إيرين يوسف، في معرض القاهرة الدولي للكتاب الـ47.
والديوان الذي أصدرته الهيئة العامة للكتاب، هو الأول لصاحبته، ومع ذلك فقد حقق مردودًا متميزًا من الجمهور المتابع، ونجاحًا كبيرًا توَّجه بفوزه بجائزة مؤسسة «ساويرس» للشعر العامي والتي أعلن عنها قبل أيام.
تمزج الشاعرة في ديوانها التجربة الإنسانية بالحالة الرومانسية، وإن غلب عليه رُوح الحنين للماضي في الزمان والمكان، وتستعرض فيه الشاعرة قدرتها على التحكم في اللغة وتطويع الألفاظ.. ومن بين قصائد الديوان:
غمض قوي
وخف ضغط الأمنيات المؤلمة
شيل من دماغك بكرة
وانزل سلمة
شغل أغاني الذكريات
استدعي مشهد م اللى فات
وارجع كمان تانى لورا
صحي اللي مات
هتلاقي لعبة مكسرة
وكتاب.. وحبة كراسات
شم الخبيز اللي استوى
وريحة الرصاص فـ المقلمة
وانزل كمان كام سلمة
اعمل بورقك مركبة
حس الأيدين الطيبة
حتى وهما بيضربوك
امسك فـ ديل توب والدتك
واجري اترمي فـ أحضان أبوك
اضحك عشان من غير كلام راح تتفهم
وكل يوم بيعدي عيد
ولو جعان
ميت ألف إيد يتسابقوا لأجل يشبعوك
اضحك قوي
في قاموس براءتك
الوجع:
مازدش عن جرح الركب لما بتجري وبتقع
والعجز:
نَص طويل في درس المحفوظات
أو بالكتير كام مسألة
اضحك أوي
مفيش مجال للمشكلة
ومفيش ف بالك أسئلة
واستجوابات
ولا كام بكام
ولا فين وليه...
اطفي أغاني الذكريات
فتح بقى
حسيت بإيه؟
