حكاية 5 سيارات «مرسيدس» أشعلت مواقع التواصل.. مجدي: «سعودي يهديها لحبيبته أفنان بعد شفائها».. إيمان تسخر: «عالم فاضية ملناش دعوة بيهم».. أماني: « سيارات مسابقة»

اشتعلت مواقع التواصل الاجتماعي «فيس بوك وتويتر وإنستجرام»، بسبب 5 سيارات مرسيدس كتب عليها حروف لاسم فتاة تسمى «أفنان»، بعض النشطاء زعموا أن سعوديا أهدى فتاة تدعى «أفنان» خمس سيارات مرسيدس بعد خروجها من المستشفى، طالبًا خطبتها، فيما ذكر آخرون أن السيارات عرضتها شركة تجميل تسمى «أفنان» تقدم واحدة منها للعميل الذي سيشتري أكبر كمية من معروضات الشركة، وبين هذا وذاك سخر المصريون من الرواية قائلين «عالم فاضية.. ملناش دعوة.. خليكي إنتي كده فرحانة بعروسة المولد اللي جابهالك بـ120 جنيه».

هدية لحبيبته
قال مجدي شوشة: «بدون تعليق.. أخ سعودي جاب للبنت اللي عاوز يرتبط بيها هدية خمس عربيات مرسيدس وكل عربية عليها حرف من اسمها اللي هوAFNAN»، وذكر ماجد نشكتي المشاكس: «طبعا اللي هيشوف الصورة هيقول دي في معرض عربيات مرسيدس.. هقوله لا دا واحد حب يجيب هدية للبنت اللي عايز يرتبط بيها.. وجبلها خمس عربيات مرسيدس وكتب على كل واحدة حرف من اسمها فيه حاجة اسمها فن اختيار الهدايا».

وأضاف دولا دي خيا: «ده واحد سعودي جاب هدية لحبيبته خمس عربيات مرسيدس، وكل عربية عليها حرف من اسمها «afnan» بعد خروجها من المستشفى.. المجد للفقراء»، وتابعت حنيين: «ده سعودي جاب للبنت اللي عاوز يرتبط بيها هدية خمس عربيات مرسيدس، كل عربية عليها حرف من اسمها «AFNAN» عشان يخطبها»، ورد فزاع أبو زهران: «بس بقى بلا قلبة دماغ».

ملناش دعوة
وقالت إيمان: «عالم فاضية.. ومش عارفة تودى فلوسها فين!» وأضافت ورد مازن شمسم: «ملناش دعوة»، وكشفت نانيس ناني: «دي صورة عربيات هدية، خمس عربيات مرسيدس وكل عربية عليها حرف من اسم افنان الباتل لأكثر ناس يشترون من منتجات التجميل اللي هي ليها خط إنتاج خاص بيها.. البنت اسمها افنان الباتل، وهي خريجة لغة إنجليزية من 10 سنين احترفت التصوير، وبعديها عملت أكاونت على إنستجرام، وتتزل صور بسيطة بعدين انشهرت وبقى يجيلها إعلانات على الصفحة ولايكات كتير خلال ست شهور، جمعت أول مليون بعديها حياتها وحياة أهلها اتقلبت بقت أول سيدة أعمال سعودية تبلغ من العمر ٢٦ سنة بدأت من لا شيء الآن ثروتها تقدر بالمليار وعندها أسهم ومستحضرات تجميل باسمها».

سيارات مسابقة
وقالت أماني: «بلا كذب هذه السيارات معروضة للمسابقة، هي عاملتها ما في حدا خطبها ولا شي»، وأضافت إيمان: «مو انو شخص خاطبها بس جايتها هدية عشانها خرجت من المستشفى، وهي قالت إنها تحتفظ بسيارتين وتلاتة سيارات ح تعطيهم أكتر ناس يشتروا من منتجات التجميل»، وعلقت نبيلة نور المحمدي بقولها: «أقولكم معلومة تايهة عنكم.. خطيبها ده ذكى جدا.. حركة شيك وان كانت غالية.. بس افنان مش هتقدر تسوق ولا عربية.. علشان القانون السعودى بيمنع المرأة من السواقة ومن حضور ماتشات الكورة»، ورد عمرو عبد القادر: «وبعدين ف حرقة الدم دى».

حلاوة المولد
أما محمد جمال، فعلق على الصورة بقوله: «طبعا اللي هيشوف الصوره دي هيقوللي يا عم انت مصور معرض عربيات مرسيدس ليه يعني هقوله في الحقيقة دي مش صورة معرض عربيات.. ده واحد سعودي جاب للبنت اللي عاوز يرتبط بيها هدية خمس عربيات مرسيدس وكل عربية عليها حرف من اسمها اللي هو «AFNAN» بمناسبة خروجها من المستشفى، وعشان يخطبها أن تعرف تكتب اسم حبيبتك على الحور العتيق ماشي. تكتبه على شط إسكندرية ماشي.. تكتبه على تورتاية مفيش مشكلة، لكن تكتبه على خمس عربيات مرسيدس.. طب مكنت جبتلها واحد اتوبيس نقل عام احسن.. ولا مقطوره صغيرة، ووفرت طب كنت حب واحدة اسمها «مي» مثلا هتبقى حلوة وموفرة جدا، لكن «افنان» خمس حروف؟! هتتعبك يابني في حياتك بعد كده.. بس برده الحمد لله ارحم من ماهيتاب وباكينام.. سبع حروف».

أول هدية
واستطرد محمود: «فكرني بأول هدية جبتها لبنت.. كنت في إعدادي طب أسنان.. واديتها الضفدعة التخينة.. وأخدت أنا الصغيرة.. وقولتلها مش مهم أشرح أنا.. المهم تشرحي إنتي الضفدعة وتفصصي أعضاءها كويس وتحلي حلو في الامتحان، ‫‏رومانسية ده غير واحد صاحبي اعرفه عمل حركة زي دي برضه، وجاب لمراته كيلو تفاح أمريكاني من كارفور كان عبارة عن 5 تفاحات.. فضل يذلها بيهم شهر.. مع أنه أكل منهم 3 تفاحات على السلم قبل ما يطلع... وتفاحة وهو بيرن الجرس.. ولما دخل البيت قطع التفاحة أربع تربع... أخد 3 واداها ربع.. وواحد تاني راح يخطب وجاب علبة شوكلاتة ولما الموضوع باظ اتخانق مع أبوها عشان رجعوا العلبة ناقصة الشريطة.. ع العموم خليكي إنتي كده فرحانة بعروسة المولد اللي جابهالك بـ120 جنيه.. وكلي سمسمية وفولية يا هبلة.. أحبك وايد ‏انت كاتب افنان غلط يا بيبي‬، ‏امال بتتكتب ازاي؟! ‏أفننننننننناااااااان‬ ‫‏كده باقي 19 مرسيدس تاني».