«عشوائى» قصيدة لـ«مينا أميل يوسف»

عشوائى لما اتولد
فرح أهل البلد
مع إنه كمالة عدد
في المواليد الجدد

عشوائى خلص مدرسة
عشوائى دخل الهندسة
عشوائى خلص تعليمه
ومعاه شهاده كويسة

عشوائى دخل الجيش
يمسح جزمة شاويش
يمسح لمراته الشيش
 يتهرى تلطيش

عشوائى خلص جيش
وفرص الشغل ما فيش
و طاولته شيش بيش
في جيبه قرش حشيش

عشوائى ساق توكتوك
وعمل حساب فيس بوك
ولبسه ديرتى لوك
و شكله بقى نيو لوك

عشوائى قال أحرار
وأنا من الثوار
حنولعها نار
ونطرد الأشرار

عشوائى من الملتحين
لبس عباية الدين
ودقنه دى مترين
وعمته شبرين

عشوائى رجع من تانى
لا ثورى ولا إخوانى
في وضع لا إنسانى
الكل فيه بيعانى

عشوائى قال يا جواز
لا شقه ولا جهاز
ولا شغله ولا إنجاز
ولا عاد في شىء حفاز

عشوائى أجدع شاب
خصوصا في الانتخاب
بياخد مية جنيه
ولا عمر مرشحه خاب

لا لاقى إيجار جديد
و لا في مكان بعيد
لكن عنده عشة
على السكه الحديد

عشوائى عمل الشارع
ساحة انتظار
عشوائى بلطجى بارع
في تحصيل الإيجار

واللى يقول معلش
بيقطعلوا الكاوتش
ويضربه على الوش
ويعمله ساندوتش

عشوائى بقى بياع
بياع حبوب صداع
و كل اللى في الجدول
بلبع بلابيع بلباع

عشوائى بقى سمسار
بيتاجر في الدولار
وبقى شغال من نار
على باب المطار

عشوائى بيزنس مان
وواحد من الأعيان
وغير اسم عشوائى
و نسى كل اللى كان

واحنا في بلد نائى
فيها بشر عشوائى
فيها مسئول هوائى
و كل ده غوغائى