«عشوائي» قصيدة لـ«مينا إميل يوسف»

عشوائى لما اتولد
فرح أهل البلد
مع أنه كمالة عدد
فى المواليد الجدد

عشوائى خلص مدرسة
عشوائى دخل الهندسة
عشوائى خلص تعليمه
ومعاه شهادة كويسة

عشوائى دخل الجيش
يمسح جزمة شاويش
يمسح لمراته الشيش
ويتهرى تلطيش

عشوائى خلص جيش
وفرص الشغل ما فيش
وطاولته شيش بيش
فى جيبه قرش حشيش

عشوائى ساق توكتوك
وعمل حساب فيس بوك
ولبسه ديرتى لوك
وشكله بقى نيو لوك

عشوائى قال أحرار
وأنا من الثوار
حنولعها نار
ونطرد الأشرار

عشوائى من الملتحين
لبس عباية الدين
ودقنه دى مترين
وعمته شبرين

عشوائى رجع من تانى
لا ثورى و لا إخوانى
فى وضع لا إنسانى
الكل فيه بيعانى

عشوائى قال يا جواز
لا شقه ولا جهاز
ولا شغله ولا إنجاز
ولا عاد فى شيء حفاز

عشوائى أجدع شاب
خصوصا فى الانتخاب
بياخد مية جنيه
ولا عمر مرشحه خاب

لا لاقى إيجار جديد
ولا فى مكان بعيد
لكن عنده عشة
على السكة الحديد

عشوائى عمل الشارع
ساحة انتظار
عشوائى بلطجى بارع
فى تحصيل الإيجار

واللى يقول معلش
بيقطعلوا الكاوتش
ويضربه على الوش
ويعمله ساندوتش

عشوائى بقى بياع
بياع حبوب صداع
وكل إللى فى الجدول
بلبع بلابيع بلباع

عشوائى بقى سمسار
بيتاجر فى الدولار
وبقى شغال من نار
على باب المطار

عشوائى بيزنس مان
وواحد من الاعيان
وغير اسم عشوائى
ونسى كل إللى كان

واحنا فى بلد نائى
فيها بشر عشوائى
فيها مسئول هوائى
وكل ده غوغائى