«الناظر» للنواب: «اوعوا تاكلوا لب وسوداني في الجلسات وتنسوا الشعب»
قال الدكتور هاني الناظر، الرئيس السابق للمركز القومي للبحوث، لأعضاء مجلس النواب: "مبروك نجاحكم واسمحوا لي أقول لكل واحد من حضراتكم كلمتين من القلب، الأولى أن اللي فات كان الجزء السهل من المشوار والجاي هو الأصعب بكثير".
وأضاف، على صفحته الرسمية "فيس بوك"، أن الكلمة الثانية "خلي بالك يا سيادة النائب من هنا ورايح من كل حرف وكل لفظ بتقوله تحت القبة وخارجها وكل تصرف، واوعى تنسى وتنام في الجلسة أو تقعد تتكلم في التليفون أو تقعد تتفرج على الناس، وهي بتشترك في الحوارات أو تغيب عن الجلسات أو تأكل لب وسوداني أو تمضغ لبان".
وتابع: "اوعى تقعد تتكلم مع اللي جنبك وتنسى الحوارات، أو تشتم حد أو تغلط في حد أو تجري على إمضاء ورا وزير، لأن كله بيتصور ويتسجل.. وخليك فاكر أن أنت دخلت البرلمان علشان تشارك في سن التشريعات والقوانين ومراقبة أداء الحكومة وتصوب الأخطاء بالورقة والقلم مش بالتكهنات والإشاعات وأنك مسئول عن الشعب وحقوقه وبتعبر عنه وعن مشاكله وتسعى لحلها".
ووجه لهم رسالة قائلا: "وبفكر حضرتك أن الزمن تغير والدنيا بقت غير الدنيا، وبفكرك أن كل تصرف أو كلمة منك أو صورتك هاتكون عنوان بوستات على صفحات فيس بوك أو أقوال مأثورة على التويتر أو خبر على المواقع الإخبارية، بتلف بيوت ونوادي وقهاوي مصر كل يوم بالليل، وهيكون عليها تعليقات كثير جدًا وسيرتك هتكون على كل لسان، لأن من أول النهارده حياة حضرتك العامة والخاصة أصبحت مش ملكك وبقت تحت المجهر".
وأضاف قائلا: "خللي بالكم جدًا واشتغلوا بمنتهى الجدية والأمانة، واتقوا الله وراعوا الشعب ومصر، وآخر نصيحة أقولها لحضراتكم نائبات ونواب واوعوا تنسوها أبدا إن حساب الشعب قاسي وصعب".
