امتدت ظاهرة المهرجانات الشعبية، في مصر إلى مرشحي برلمان 2015، بعد أن رفع المرشحون شعار "مهرجانى باسم حضرتى" ودفع عدد كبير منهم ببعض المهرجانات الغنائية لجذب الناخبين للتصويت لهم، وظهرت الفكرة بثوبها الجديد خلال انتخابات الجولة الأولى، لتظهر المهرجانات بشكل أكبر في دعاية المرحلة الثانية، ويظهر معهم مبشرات البرلمان المقبل والمتوقع ظهوره بشكل برلمان "على واحدة ونص".
يا صبيح يا بلاش
جاءت دعاية المرشح محمد صبيح بدائرة المطرية الأطرف إذ حثت كلمات المهرجان المواطنين على النزول بطريقة طريفة حيث قالت "محمد صبيح دا من المطرية، مرشح دايرة وميه ميه، الشباب واقف معانا، بكل قوة وكل حماس، رمز الأسد ورقم واحد، انتخبوه قوام يا ناس، يا صبيح يا بلاش، واحد غيره مينفعناش، انزل ورشحه واديله صوتك، عملت إية بس بسكوتك، رمز الأسد ورقم واحد، والناس عرفينه واحد واحد، اقف بكل حماس معانا، انزل رشحه ويانا، علشان بلدك ابنك وابنى، لازم نفوق كل الناس".
انتخابات الرعب
وبدأ المرشح عبد الحليم محمد، المرشح المستقل الحاصل على رمز الصاروخ بدائرة أشمون التابعة لمحافظة المنوفية هو الآخر في طرح أغنية خاصة به على طراز المهرجانات وجاءت كلماتها "عبد الحليم محمد عبد الحليم، مرشح دايريتنا وماشى في السليم، نفسه يعمل كل خير، عاوز يشتغل بضمير، باذن الله هتشوف بعينك، وثقة في الله أكيد تغيير، بدأت انتخابات الرعب، لمرشحين مجلس الشعب، رافعين شعار التحدى، وهنتحدى كل صعب، إيدينا في أيد بعض هنبدأ، وبخطوة واحدة هنسبق، مصر هي هدفنا، وهنشيلها فوق كتافنا، كلامنا كله طموح، جبس وطريق مفتوح، حط ايديك في ايدينا، حلمك هيبان بوضوح".
سيبك من الإجرامية
فيما هاجم مرشح المصريين الأحرار جمال عباس مرشح دائرة الجمالية، الجماعة الإرهابية بلغة المهرجانات وجاءت كلمات الغنوة " أصحى صحينى، صحيا عالميا، المجلس مش تكية، محتاج لمفهومية، سيبك من الإجرامية، ومتديش الأمان، دا ناخبنا دا حبيبنا، وملوش في البلطجية، ويقول كل ال فيك، وهتبقى البلد ال هي، أنا اخويا مات شهيد، علشان اللحظة ديه، ال ملوش صوت أكيد، مهوش من الجمالية، جمال عباس دا أسمى، واسم الملايين".
شبهى وشبهك
واستكمالًا لمسلسل الدعاية الغنائية بالأسلوب الشعبى، قدم المرشح علاء مستقل عن دائرة كرداسة في المرحلة الأولى مهرجانًا لأهل الدائرة وحثهم فيها على النزول والتصويت له وجاءت كلمتها "علاء والى رمز المدفع والرجولة، من أجل العيش والحرية، من أجل عدالة اجتماعية، واحد مننا شبهى وشبهك، حامل همى وحامل همك، حاسس بجراحى وجراحك، ومعايا في حزنى وأفراحى، وعلشان دايما يسعدنا مبينمش ودايمًا صاحى، علاء هو حببنا ومحدش غيره نايبنا".
ميه ميه
"مية مية" كان عنوان مهرجان المرشح عبد الباسط الشرقاوى، مرشح دائرة دمنهور التابعة لمحافظة البحيرة في الجولة الأولى وجاءت كلماته "انتخبوه انتخبوه عبد الباسط الشرقاوى انتخبوه، انتخبوه انتخبوه اقفوا وراه وساندوه، عبد الباسط الشرقاوى راجل ميه ميه، مرشح دايرتنا ومعروف في الجمهورية، رقم واحد هو ورمزه العربية، نفسه يعمل كل خير، ومن كل قلبه وبضمير، إن شاء الله هتشوفوا بعنيكم، ثقة في الله وكل خير، مصر هدفنا، وهنشلها فوق كتافنا، وشبابنا كل طموح، نفسه في طريق مفتوح، حط ايديك في ايدينا وحلمك هيبان بوضوح ".
مصر يابا هدفنا
ولعب سيد سلطان مرشح دائرة الفيوم على أكثر ألحان الأغانى الشعبية تداولًا في الفترة الأخيرة والتي عرفت باسم مفيش صاحب يتصاحب، بعد النجاح الكبير الذي حققته تلك الأغنية وتداولها بشكل أكبر من المتوقع، حيث جاءت كلمات أغنية المرشح " الحصان يعنى السرعة يعنى السرعة في الأداء، رمز الحصان يا إخوانا خلو دايمًا على بالنا، سلاحه هو الحق وعارف كل ناس أحوالنا، بدأت انتخابات الرعب، مرشحين مجلس الشعب، شعارنا التحدى ونتحدى أي صعب، ايدينا في ايد بعض هنبدأ، وبخطوة صح أكيد هنسبق، مصر يابا هي هدفنا، وهنشلها فوق كتافنا، شبابنا الطموح، حط ايديك كده في إيدينا هيبان الطريق بوضوح، الفيوم هي محافظتنا، وهنترشح في دايرتنا، العمدة سيد سلطان، ورمزه ال حصان، ثقة بالله نجاح، وهنكسبها باكتساح، وعلشان الخير شعارنا، وهننصر الفلاح ".
حاسس بجراحك
وعلى نفس الخطى سار المرشح فتحى الناظر مرشح دائرة جهينه، التابعة لمحافظة سوهاج، وجاءت كلمات المهرجان الخاص به "لما تقول البلد محتاجة رجالة، هتلاقى فتحى الناظر عمره ما يتأخر استحالة، وهنفضل جمب نايبنا، علشان والله حبيبنا، الشعب بيتكلم، يا أبو الناظر يا ملعم، دا الشعب بيتكلم، من أجل عدالة اجتماعية، من أجل العيش والحرية، قول صوتك يا كبير، نايبنا فتحى الناظر، واحد مننا شبهى وشبهك، عارف همى وشايل همك، حاسس بجراحك وجراحى، وشاركنى في حزنى وأفراحى، وبيفضل دايمًا يسعدنا، وجمبنا هيفضل صاحى".
