«حجاجوفيتش» يكشف سر تقدم اليابان بعد تدميرها في 10 نقاط

كشف أحمد حجاجوفيتش، الرحالة المصري، عن سر تقدم اليابانيين، بالرغم من معاناة اليابان من قنبلتين نوويتين وعدد من الزلازل الكاسحة وانفجار لمفاعل نووي.

وحدد حجاجوفيتش سر التقدم الياباني في 10 نقاط، من خلال فيديو تدمير اليابان وعودتها مرة أخرى. 

وكتب حجاجوفيتش على صفحته الرسمية بـ"فيس بوك"، عن سر تقدم اليابان "1- الأطفال بيدخلوا المدرسة لما يبقى عمرهم ٦ سنين، عشان قبل كدة هما بس بيستمتعوا بطفولتهم، والتعليم في اليابان ١٢ سنة بس ولازم تحضر منهم ٩ سنين إجباري (إللي هي عندنا حضانة وابتدائي وإعدادي)، ومفيش حاجة اسمها امتحانات فيهم؛ لأنهم داخلين المدرسة علشان يتعلموا ويتعرفوا على الدنيا مش عشان يحفظوا ويمتحنوا".

وأضاف: "2- كل واحد حر لو عايز يكمل دراسته بعد الـ٩ سنين، لكن أكتر من ٩٧٪ بيكملوا لأنهم بيعشقوا المدرسة والتعليم، لما بيكملوا في المرحلة الثانوية بيبتدوا يتعمل لهم امتحانات بسيطة مش عشان يختبروهم، لأ، عشان يختبروا ويعرفوا هل المدرسين إللي درسوا لهم فهموهم كويس، ويقدروا يميزوا بين الطلبة الممتازة والمتوسطين فكريًا".

وتابع: "3- مافيش حاجة اسمها أن حد يسقط ويعيد السنة في اليابان، عشان ده بيقضي على روح الجماعة والاتحاد؛ لأنهم بيعتمدوا أن الطلبة إللي في الفصل الواحد بيفضلوا مع بعض لغاية ما يكملوا دراستهم، ولو سقطوا أي طالب في سنة من السنين وخلوه يعيد السنة مع الطلبة إللي أصغر منه حيعاملوه على أنه غبي، ويكره التعليم ويبقى أغبى ويجيب نتائج عكسية، ولكن في اليابان اكتشفوا أن الطلبة إللي مش متفوقين في المدرسة دايما بيبقوا أذكى وأفضل وأنجح ناس في الحياة العملية والشغل بعد كدة!".

وقال: "4- كل الطلبة اليابانيين لازم تقلع الجزم لما تدخل المدرسة وتسيبها في صناديق مخصصة عند الباب الرئيسي (زي الصناديق إللي في المساجد كدة) ويلبسوا شباشب، وبعدين كل يوم قبل ما يروحوا البيت لازم ينظفوا المدرسة كلها، حتى الحمامات وده بيخلي عندهم إحساس أن المدرسة لازم تبقى أنظف مكان في الدنيا".

وأضاف: "5- لو حصل وأعلنت الحكومة اليابانية تأجيل الدراسة (زي ما اتأجلت أيام القنبلة النووية في هيروشيما وأيام المأساة الثلاثية (الزلزال المدمر - التوسونامي - التسرب النووي "كل ده في يوم واحد") في فوكوشيما، كتير من التلاميذ والطلبة بيجيلهم اكتئاب شديد وساعات بيدخلوا في صدمة عصبية حادة؛ لأن المدرسة بالنسبة لهم أهم وألذ وأجمل وأمتع مكان في الدنيا كلها، والغالبية العظمى من اليابانيين بيحبوا مدارسهم أكتر من بيوتهم".

وطالب حجاجوفيتش بتطبيق ذلك في مصر، وبناء جيل جديد في 10 سنوات، وقال "يمكن بعد ١٠ سنين البلاد التانية تسمينا "كوكب مصر الشقيق"، تفتكروا أيه إللي ناقصنا في التعليم المصري عشان يبقى زي التعليم الياباني؟!".