بالفيديو والصور.. أسرة من 12 فردا تعيش في خيمة وسط القمامة بالدقهلية
تعيش أسرة مكونة من 12 فردا من أبناء مدينة دكرنس التابعة لمحافظة الدقهلية، حالة من المعاناة والبؤس، حيث يعملون في فرز القمامة وبيعها؛ من أجل الكسب المشروع وعدم مد الأيدي للغير.
أسرة تعيش داخل «خيمة» مكونة من أربعة اعمدة خشبية متهالكة، يغطيها خوص شكائر الأرز، بها عدة أوان لإعداد الطعام، ويعيش معهم عدد من القطط والكلاب الضالة المتواجدة بجوارهم، هذا هو حال أسرة عبد البارى.
ويقول عبد البارى عائل الأسرة: «أنا عايش هنا من 20 سنة ولا أملك شيئا سوى شغلى ده وعندى 10 عيال هم 9 صبيان وبنت وبصرف عليهم من الشغل ده».
وأضاف: «لا أملك أن أدخل أبنائى المدارس لأننى لا أقدر على شراء شنط أو كتب أو دفع المصاريف العادية للدراسة».
وطالب عبد الباري، المسئولين بإعطائه شقه ليعيش فيها هو وأبناؤه لتحميهم من الشارع، قائلا: «أتمنى من المسئولين أن يعطونى شقة ولو غرفة وصالة لأننا مش هنلاقى مكان نقعد فيه في البرد».
وتابع: «أوقات بناكل العيش حاف لأنه بيكون فيه أيام مفيهاش شغل ومش بناكل لحمة غير مرة كل 4 شهور وأوقات في العيد».
وقالت الأم: «أنا نفسى ولادى يبقوا أحسن الناس ولكن الظروف حكمت بكده علينا هيا دى حياتنا وهو ده اللى تربينا عليه أنا عارفة إن ولادى مش راضيين بده بس مش هنقدر نوفر كل حاجة لـ 10 عيال».
وأضافت: «الناس بتفكر إننا معانا فلوس كتير وإن التنقيب في الزبالة ده بيجى من وراه فلوس بس الناس اللى بتتكلم تيجى تجرب يوم واحد في وسط الأمراض تيجى تشوف عيالها وهما شكلهم كده وهما مش قادرين حتى يدخلوا المدرسة أو يلعبوا مع الأطفال في الشارع».
