كلام في سرك يا ريس.. في ذكرى رحيلك!

في جوابي ده هحكيلك يا ريس ببساطة..من غير تزويق كلام ومن غير كلام مجعلص..
زي النهاردة فارقتنا وسبتنا من غير ما تقول..قضاء الله ولا راد له..وأنا أصلا مش عارف أبتديلك منين..ولا أشتكيلك من مين..أو للأمانة مش عارف أشتكيلك من مين ولا مين..من أنصارك ولا من خصومك..من اللي بيقولوا إنهم بيحبوك..ولا من اللي بيكرهوك.. من الحكام ولا من الجماهير..من اللي كانوا بيخافوا منك ولا من الناس اللي كانوا بخطبه واحده يتحركوا ويعملوا اللي انت عايزه..

كل حاجة اتلخبطت يا ريس..بعض من أنصارك لم يتعلموا منك أي حاجة..كنت إنت في الاجتماعات أكتر واحد بتسمع..وآخر واحد بيتكلم..هما النهاردة لا بيتكلموا ولا بيسمعوا..بيصرخوا ويهتفوا ليل نهار..حتى الجيش..ومش عارف أقولهالك إزاي..هت هت..هتفوا ضده..أيوة والله العظيم..جيش مصر أومال إيه..جيشك..اللي كان جيش الملك وانت رجعته جيش الشعب..ده كمان في مصيبة تانية..بس..بس..مش عارف أقولهالك هي كمان إزاي..هقولها بسرعة وخلاص..في ناس يا ريس من اللي بيقولوا انهم احبابك اتحالفوا مع اللي بيقولوا الـ 60 سنة اللي فاتوا حكم قال إيه.."عسكر" !

المهم يا ريس لأن حكاية جزء من أنصارك دي طويلة شوية..هقولك حال خصومك..بقينا يا ريس بنحس واحنا بنكلمهم إنهم عندهم حاجة في مخهم..لا مش جلطة..ده هما يجيبوا جلطات للبلد كلها..لكن حاجة تانية خالص..مرة يقولوا للسيسي الغ الأحزاب يا سيسي..الغ الانتخابات يا سيسي..اقفل الصحف..اقفل الفضائيات..وبعد شوية تلاقي ناس منهم يقولوا عليك..لمؤاخذة يعني..قال إيه دكتاتور..رغم أنك لا لغيت انتخابات ولا مجلس الشعب..لغيت الأحزاب بس..وأنا عارف ليه..لأن الفترة بتاعتك كانت لازم تتوحد الجهود مكانش ينفع اختلاف الآراء..

وسبب تاني..هو أن الانتخابات لو اتعملت بالأحزاب القديمة كان هينجح الباشاوات والرأسماليين الكبار لأنهم أصحاب الثروة والنفوذ..ودول لا يمكن يوافقوا في البرلمان على القوانين اللي هترجع للغلابه حقوقهم..لا عمال ولا فلاحين..يعني ببساطة لا كأنك انت والظباط عملتوا ثورة ولا حاجة..

أنا فاهم..فاهم كمان إنك كنت عاوز تعلم الناس قبل الديمقراطية علشان محدش يعرف يضحك عليهم باسم الدين..فاهم بس الكلام جاب بعضه..وهقولك على حاجة تانية..يقولوا للسيسي بلاش محاكمات..ويقولوا للشرطة اضربوا في المليان.وبعد شوية تلاقي الواحد منهم يقول عليك يا ريس أن عيبك الوحيد هو اعتقال الإخوان..طب دول مجانين ولا لأ يا ريس ؟!

وهقولك على حاجة كمان واللي يحصل يحصل.. عارف يا ريس مجانية التعليم باظت من بعدك..لا في مجانية ولا تعليم..والناس العبط دول..المجانين اللي قلنا عليهم بيقولوا إن المجانية السبب.. رغم أن الفوضى اللي حصلت من يوم رحيلك زي النهاردة من 45 سنة كاملين هي السبب..لكن تقول إيه في المجانين..ونفس الكلام بيقولوه على الأرض الزراعية وتفتيتها رغم أنك سبتلهم بنك القرية والجمعيات التعاونية علشان التفتيت ما يحصلش..لكن لا عاد في بنك..ولا جمعية..ولا حتى القرية..

ولكن خايف أقولك على مصانع مصر..وثروة مصر..واللي جرالها.. بصر..بصر..بصراحة كده يا ريس وبالمفتشر..با..با...باعوها كلها..وكل حاجة باعوها بعشر تمنها.. وهيعمل ايه العمال يا ريس..مغلوبين على أمرهم..يا يسكتوا يا أمن الدولة يسحبهم واحد ورا التاني..وأغلب عمالك يا ريس على القهاوي..أو جاتلهم أمراض الدنيا..

والشباب يا ريس اللي كان بيروح بالبدلة يحضر حفلات ام كلثوم..ويلبس اللبس العسكري عند أي مشكلة..بقي ماشي في الشوارع يتحرش ببنات مصر..وأكتر من كده لكن إن الله حليم ستار!

بنكلم معاك وأخاف تسألني عن سوريا..أنا عارف أن روحك كانت فيها..اتآمروا عليها يا ريس وأغلبها محتل..لا..يا ريت كان من إسرائيل..إسرائيل بتحرك كل المصايب من بعيد..مش عايز أقولك من مين..كفايه اللي قلته..وبكلمك يا ريس وأنا خايف تسألني عن ليبيا اللي جالك ضباطها الأحرار علشان يضموها لمصر وقلتلهم استنوا شوية..ولا اليمن اللي تعبت فيها..ولا العراق اللي كنت بتغير حكامه اللي ضد شعبه بخطبة واحدة..

أنا بكلمك وانا مكسوف..لكن.عاهدتك على الصراحة..ومع كل اللي حكيته ده..لسه المجانين اللي كلمتك عنهم سايبين كل ده..ولسه بيهاجموك علشان نكسة 67..أيوه..بيحتفلوا بيها مع الصهاينة كل سنة..وكأن ربنا مسلطهم على الشعب المصري يلعبوا في معنوياته طول العمر..بس على فكره..ناس كتير قوي..قوي قوي..بتذكرك بكل خير..وجايبين سيرتك برضه بكل خير..ومنهم ناس محضرتش عهدك زيي انا كده..بس قروا وفهموا..وشغلوا مخهم..

لكن اللي بكلمك عليهم الأولانيين دول سابوا دماغهم للإخوان..ولعبولهم فيها..دول يا ريس يشتموا في الإخوان وبيصدقوهم في نفس الوقت..بس برضه ربنا فضح الإخوان وجابلك حقك..وفضح الانفتاح والتموين رجع تاني..وفضح الخصخصة والمصانع بدأت ترجع تاني..وفضح أمريكا والناس بتكرهها..ونسيت اقولك..مصر بتتعاون مع روسيا تاني اللي جبتهم بنولنا السد العالي والمصانع.. ورجعنا علاقتنا مع الصين اللي اعترفت بيها أول واحد وكان الاعتراف بيها حاجة كبيرة تزعل كل الدول الكبيرة..وأفريقيا بنرجعها..

أصلي مكانش ينفع غير كده ولا يصح إلا الصحيح..ما هما كل ما يروحوا في بلد أفريقي يلاقوا صورك هناك..هضحكك يا ريس.. مرسي بتاع الإخوان أول ما جه رئيس.. كلام في سرك ناس بيقولوا على نفسهم ناصريين انتخبوه..آه والله..انتخبوا مرشح الإخوان..أنا ما أكدبش يا ريس..

المهم خليني أضحكك..قوم إيه مرسي راح اجتماع في منظمة المؤتمر الإسلامي..لقي صورتك هناك ما انت اللي مأسسها..بعديها راح اجتماع دول عدم الانحياز..لقي برضه صورتك هناك..ما انت اللي مأسسها..خد التالتة يا ريس..قوم إيه راح اجتماع الوحدة الأفريقية..لقي برضه صورتك هناك..ما انت اللي مأسسها..آخر حاجة آخر حاجه..راح يحلف اليمين في المحكمة الدستورية العليا..ايوه..فخر مصر..فخر القضاء المصري..عرف إنك انت برضه اللي مأسسها.. الراجل كان هيطب فيها والنور قطع..اضحك يا ريس..الأمل في شعبك كبير..الأمل في الله اللي كنت بتحمده في كل خطاب ميت مرة كبير..والجواب الجاي هطمنك على مصر بإذن واحد أحد !
والسلام ختام !