حكومة «الأسطى حنفي»!

«أنا لا أسكر، ولا أتجمل». هذه هي الحقيقة. وإن كنت لا أُلزم أحدًا أن يلتزم بالضوابط التي وضعتها لنفسي.. لكن أنا- كـ«أيمن»- استفزني التصريح الحكومي «المكرر» الخاص بـ«إغلاق جميع الملاهى الليلية ومحال الخمور بجميع أنحاء الجمهورية في وقفة عيد الأضحى المبارك، ابتداءً من الفجر وحتى وقفة عرفات».

يعني يا محترم- والكلام ده على عهدة مصدر أمني- هيقفلوا 450 ملهى ليلى ومحل خمور في القاهرة والجيزة..  والقرار ده يشمل الأماكن إللي زي دي في باقى المحافظات.. والحكومة مش هتسمح بفتح أو تشغيل الملاهى أو المحال دي، وفي المنشآت السياحية إللي بتبدأ من نجمة وحتى 5 نجوم..  وإللي هيخالف هيحيلوه للنيابة.. أي والله زمبقولك كده!!

يمكن سعادتك تعترض وتقول: وإيه إللي مزعلك قوي من القرار ده.. ودا بدل ما نشجع الدولة إنها تقضي على الفسق والفجور، والعُري والدعارة، والسكر والعربدة.. .

طبعًا من حقك تعترض.. لكن عاوز أسألك برضو.. هو إيه الغرض من القرار ده؟ هي الحكومة عاوزه الناس يستقيموا ويصلوا ويبطلوا الهباب إللي بيشربوه، ولا عاوزه توصل رسالة للمسلمين في العالم بإننا بنحترم المناسبات الدينية؟

طيب يا ستي الحكومة، هو إنتي بتشجعي السياحة الخارجية والداخلية ولا بتحاربيها؟ وهو من إمتى حضرتك يا حكومة خدتي قرار وطبقتيه؟ وإن كنت ناسية أفكرك بمشروع القانون بتاعك إللي بيمنع بيع السجاير لأقل من 18 سنة؟!..  فاكره القانون ده يا حكومة والأطفال مرطرطين في الشوارع بيشربوا سجاير، وبانجو، وحشيش، وبيضربوا ترمادول؟!!

الحكومة مش عاوزة الناس تسكر في الليلة المباركة دي.. أوكي.. على عيني ورأسي القرار ده..  بس ممكن الحكومة الميمونة تقول لنا بالظبط مين السكران والمسطول الحقيقي.. هل هو إللي بيدخل البار أو الكباريه وبيشرب بيرة ونبيذ وويسكي عشان ينسى همومه ويعمل دماغ..  ولا الوزرا إللي «بيضربوا» تصريحات من عينة: «مصر تمتلك مستشفيات أفضل من الموجودة في بريطانيا»..  أو التاني إللي بيطالب المدرسين بإنهم يدوا دروسا خصوصية بعد انتهاء اليوم الدراسي.. !

على فكرة يا حكومة..  شكلك بقى وحش قوي والله..  فكرتيني بـ«الأسطى حنفي» إللي كلمته "مش ممكن تنزل الأرض أبدًا"..  بس خلاص هتنزل المرادي!!