البااارلمنجي: لا تقل لي «محسن البطران» ولا عنتر الزمان.. فأنا ممثل دائرة الهرم في البرلمان!

طبعا أنا مش هتكلم عن نفسى كتير، فالقاصى والدانى يعلم من «البارلمنجى» مرشح كل المصريين لبرلمان 2015.. لكن هتكلم عن سبب ترشحى هنا في دائرة الهرم محافظة الجيزة.. ولماذا الهرم بالذات..

أنا جايلكم أهه.. لأن الهرم بها صعايدة كتير وأنا راجل صعيدى.. وبها فلاحين كتير وأنا فلاح ابن فلاح.. وبها أيضا أبناء البلد وأنا أساسا حفيد من بنى الهرم الأصغر وهو المرحوم «منكورع» ربنا يبشبش الطوبة اللى تحت رأسه.. أما خوفو وخفرع فهم أجدادى من ناحية الأم.

على العموم أنا مش هطول عليكم قولولى طول.. أنا تأملت كل مرشحى دائرة الهرم _اللى هما منافسينى يعنى_ فلم أجد منهم من يستطيع أن يقف أمام شعبية البارلمنجى مرشح ثورة 25 يناير و30 يونيو وكمان ثورة 23 يوليو بتاعت الرئيس عبد الناصر زعيم الأمة ومحدش يسألنى إزاى الكلام ده لأنه موضوع يطول شرحه.

أما بقى الموضوع التانى اللى عايزين نتكلم عنه هو الأخ المرشح الدكتور «محسن البطران» الذي أعلن ترشحه أمامى في تلك الدائرة وأعلن التحدى علنا في الصحف والفضائيات.
البيه الدكتور بيتباهى بأنه ينتمى إلى عائلة برلمانية منذ السبعينيات.. طب أنا بقولك يا سيادة الدكتور إنى أنا برضه أنتمى إلى عائلة برلمانية منذ السبعينات.. ولم تمر انتخابات إلا وترشح لها والدى ومن قبله جدى ومن بعده أنا.

اعترف بأن عائلتى لم ينجح منها أحد حتى الآن، وأن عائلتك بها برلمانيون سابقون لكن في النهاية كلنا مرشحون ونواب لأن لقب سيادة النائب يُطلق على المرشح الناجح والساقط.. يعنى دى مش ميزة ياعمنا.

تانى حاجة البيه بيقول لأهل الدائرة إنه دكتور وتعلم في أمريكا وأننى حاصل على دبلوم الصناعات المتطورة _صنايع يعنى بس بندلعوه_.. طب يا سيدى هقولهالك من الآخر كدا «العلم في الرأس مش في الكراس».

ثالث حاجة السيد الدكتور بيقول للناس إنه شغل مناصب قيادية في الدولة بعكسى أنا الذي لم يتم توظيفه أساسا.. طب يا سيدى أنت شغلت مناصب كلها مع النظام السابق.. يعنى كنت رئيسا لبنك التنمية والائتمان الزراعى الذي كبل هؤلاء الفلاحين بالديون والبهدلة والسجن والشحططة أيام حكم مبارك.. أما أنا فأمثل من ثاروا على نظام مبارك.

رابع حاجة الدكتور البطران بيفتخر أنه عمل نائبًا لوزير الزراعة سابقا.. ومستشارآً للمعونة الأمريكية سابقا.. وعمل بمكتب رئيس الوزراء أحمد نظيف سابقا.. وعضوا بالحزب الوطنى سابقا.. طب يا سيدى لما كل حاجة سابقا سابقا.. سيبنى أنا بقى أبقى عضو للبرلمان لاحقا.. شايفكم مقتنعين بكلامى طبعا.. الراجل أكاديمى آه.. من عائلة برلمانية آه.. لهم خدمات على أهاليكم آه.. لكن هذا لا يعنى أنه سينتصر على البارلمنجى آه.. وعلى رأى توفيق الدقن.. أنا البارلمنجى عضو البارلمان القادم يا آه يا آه.

أظن الرسالة وصلت للزميل المرشح الدكتور محسن البطران.. فلا تقولوا لى محسن البطران ولا عنتر الزمان.. فأنا ممثل دائرة الهرم بالبرلمان!
مع تحياتى.. أخوكم «نزيه صندوق عبد المتعال الناخب» مرشح برلمان 2015 رقم صفر.. رمز الغربال!