«حلمــي حلمــك» قصيدة للشاعر «أبو الحسن حسن عكاشة»

أنا فارس فـ عينيكي يا مصر
أنا جندي فـ جنود العصر
حلمي سلاحي
وفجر كفاحي
وإرادتي دي سبيل النصر

اوع تقولي فـ يوم يا معاق
أنا برسم أحلامي معاك
عزمي أنا قوة.. بره وجوه
بص وشوف كده هنا وهناك


أنا قادر أمشي المشاوير
وأبدِّل فـ طريقي كتير
عزيمة تحدي.. ولا شيء عندي
يبعدني عن حلم كبير


أنا زيك فارس فـ الكون
عاشق إني فـ لحظة أكون
نجم وصاعد.. ليا قواعد
وألقى الضحكة فـ ألف عيون


كل كلامي ماهوش شعارات
أنا ياما جبت ميداليات
كأس وبطولة.. مراكز أولى
أنا من أولى
بجيب بطولات