النشطاء يشعلون التواصل الاجتماعي بـ«بلاها لحمة».. شريهان تنضم للحملة وتناشد الجميع المقاطعة.. أمل: مش بنشوفها إلا في الأعياد.. بسنت: متضامنة مع الحملة.. فاطمة: الكويتيون سبقونا وقاطعوا السمك

"بلاها لحمة" هاشتاج دشنه النشطاء على تويتر ضمن حملة مقاطعة اللحوم في المحافظات، بعد ارتفاع أسعارها، وتضامن عدد من المشاهير مع الحملة بنشر الهاشتاج، معبرين عن رفضهم لارتفاع أسعار اللحوم، مؤكدين أن الكويت تمكنت من مقاطعة الأسماك نتيجة ارتفاع أسعارها ونجحت في ذلك، مطالبين بالاقتداء في مصر بحملة الكويت.

قالت الفنانة شريهان "بلاها لحمة"..أناشد جميع المواطنين القادرين على شراء اللحوم مقاطعتها دعمًا لحملة بلاها لحمة و"بلاها لحمة".
وأضافت أمل عمر "بلاها لحمة أصلا اللحمة مش بنشوفها إلا في الأعياد هههههه".
وقال همان 2000 "بلاها لحمة استغنوا عنها شوية مش هتموتوا يعني".
وعلق حمدي سليمان "بلاها لحمة ماله الفول والطعمية والنابت".
وقال مصطفى خلف "الصراحة أنا مش شايف أيتوها لحمة علشان أقول بلاها لحمة".
وأضافت بسنت طارق "أنا متضامنة مع الحملة بلاها لحمة".
وقالت شيمو بنت زمورة "لما هتعملوا مقاطعة على تويتر الناس هتبطل تشتري لحمة يعني؟ بلاها لحمة".
وعلق شريف 87 "والله الناس بدأت تفوق وتعرف تجيب حقها ازاي ارجو أن الموضوع ده يبقى في كل حاجة بتغلى بدون سبب حارب الغلاء بالاستغناء بلاها لحمة".
وأضاف أحمد حوارات "بلاها لحمة ونقضيها سمك".
وقالت مريم بخيت "يعني انتوا جاييين تعملوا مقاطعة في عيد الأقباط والعيد الكبير! بلاها لحمة".
وعلق أحمد إبراهيم "تضامن مع حملة بلاها لحمة وخدلك كيلو هدية في آخر الشهر الجاي مشارك ومتضامن بلاها لحمة شهر..أما نشوف آخرة جشع الجزارين.. لما كيلو اللحمة يوصل لـ 140 في بعض الأماكن يبقي بلاها لحمة".
وقال كمال مكي "يعنى إيه لحمة.. الحمد لله إنى إسكندرانى السمك ده متعة والله بلاها لحمة.. البيضة الواحدة فيها ٢ كيلو بروتين"
وأضافت أمنية طلعت "بلاها لحمة أنا منضمة لحملة مقاطعة اللحوم.... أصلا بتجيب كوليسترول".
وقال يوسف أحمد "لو عايز لحوم رخيصة وثبات في الأسعار شارك محدودى الدخل ف حملة بلاها لحمة لمواجهة ارتفاع أسعار اللحوم".
وقالت ميتا "بلاها لحمة الهوت دوج يخش ضمن إطار الحملة".
وأضافت سارة محمد الرشيدي "سؤال بقى للى اخترع هشتاج ‫‏بلاها لحمة‬ بدون ما يقول البديل يا ترى عندك كام كيلو لحمة ف تلاجة بيتكم؟ مش قبل ما تحضر العفريت تبقى عارف إزاى تصرفه؟ ولا هو هرى وخلاص؟"
وقالت د. فاطمة العبدلي "الكويتيون قاموا بحملة خلوها تخيس ضد أسعار الأسماك؛ والمصريون قاموا بحملة بلاها لحمة ضد أسعار اللحوم؛ تعددت الحملات والسبب واحدُ".
وعلق محمد أسامة "بلاها لحمة كل فراخ".
وقال محمد غزال "فاكرين سنة 77 كان بيقولوا ياسادات ليه معلش كيلو اللحمة بـ70 قرشا أمال لو عايشين دلوقتي كانوا عملوا ايه بلاها لحمة".
وأضاف شريف الهلالي "بلاها لحمة وزي ما عملنا مقاطعة الإنترنت وناس فاتحة نت بتشوف المقاطعة عاملة إزاي هنلاقي ناس تروح تتفرج ع الجزارين وتفاصل معاهم".
وقالت ساندي 5757 "الكويت قدرت تجبر تجار الأسماك على تخفيض أسعار السمك بأنهم قاطعوهم والسمك باظ عند التجار وإحنا مش قادرين نقاطع اللحمة وهى بـ100 جنيه بلاها لحمة وطنشوا الأسماك وانسوا الفراخ خلونا في البقوليات ماله الفول والعدس زى الفل والاتنين بروتين مقاطعة واجبة".
وقال شادي السيد "بلاها لحمة والله أنا بقول كدا من زمان بس إحنا شعب بيحب العنتظة والغطرسة الفارغة".
وأضاف إسلام رجب منصور "الحاجة الوحيدة اللى الناس متقدرش تقاطعها شعب أكيل بطبعه أصلا بلاها لحمة".