غضب طلاب الثانوية العامة يشعل «تويتر» بسبب قرارات وزير التعليم..النويهي: «10 درجات شبه ضايعين».. حنين: «لازم نوصل صوتنا برفض القرار».. ماجد: «ادرس قراراتك الأول»
حالة من الغضب انتابت طلاب الثانوية العامة على موقع «تويتر»، بسبب قرار وزير التعليم بشأن تخصيص 10 درجات للحضور إلى المدارس، ودشن النشطاء هاشتاج "ضد قرارات الثانوية 2016"، مؤكدين أن تلك القرارات ستضيع مستقبلهم، خاصة أن الثانوية العامة سنة مصيرية لا تحتمل قرارات غير مدروسة.
«رفض القرار»
وقالت حنين مجدي، "ضد قرارات الثانوية 2016 مشكلة الـ10 درجات اللي على الحضور اللي ممكن تضيع مستقبلك مش هتقف عند دفعة 2016 دي هتكمل لازم نوصل صوتنا برفض القرار".
وأضاف أبو رزقا، "مؤسسة تعليمية متهالكة وبدل ما تصلح في الأساس بتجرب في مستقبل ناس وعائلاتهم من بعدهم ضد قرارات الثانويه 2016".
وعلقت منى المصري، "مش هنسكت على قرار زى ده في سنة زى دى وغالبًا مش هنسبكوا تضيعوا آخر حاجة نتعلق بيها عشان نحقق اللى عايزين نوصله ضد قرارات الثانوية 2016.. "انتو ساعات بتضيعوا أحلام ناس في التنسيق على أرقام من عشرة وانتو بتتكلموا دلوقتى في عشر درجات هتروح في الهوا!"
«ادرس قراراتك»
وقال محمد مسعد، "ضد قرارات الثانوية 2016 لحظة كدا !! هوا انت كدا بتعجزنا يعني ولا بتكرهنا في التعليم اكتر مش فاهم أنا في القرار المهبب دا؟؟"
وأضاف ماجد ممدوح، "عايز تظبط التعليم تمام بس ادرس قراراتك الأول شوف اللي بتقوله ده هيحصل ازاي على أرض الواقع مش بالورقه والقلم!"
وعلقت أمل هشام " إحنا نفضل نتعب طول السنة عشان نحقق حلم عاوزين نوصله وانت تيجي بكل بساطه تنزلنا ف الأرض بسبب قرارات فاشلة، استفدت إيه؟".
وقال عبد الرحمن أبو قمر، يعنى بعد 17 سنة تعليم وبتلغى كل المجهود ده وبتحدد مستقبلى في سنة واحدة وقولنا ماشى، لكن تضيعنا بشوية درجات "متحلمش".
وعلقت سارة الشامي، " ارجع في القرار ده عشان هتتشال.. ده لمصلحتك".
وقال محمد مسعد، "مش فاهم أنا إيه حبك في إنك تظلم ناس؟! هوا انت كدا مثلا بتبين انك مهتم وبتعمل قرارات! مش فاهم وجهة نظرك الصراحة!".
وعلقت بثينة هميلة، "قال إيه 30% امتحان مش في المنهج طب علمني إزاي افهم صح علشان أعرف أطبق وأجاوبك صح لكن مش تعلمني إزاي أبقى آلة".
«معلموناش نفكر»
وقال النويهي، " معلموناش نفكر وهيمتحنونا في التفكير غير كدا ١٠ درجات شبه ضيعين! تضيع مستقبل أجيال".
وأضافت إسراء أبو الحسن " هقولك كلمة بس: حسبى الله ونعم الوكيل.. لو بس أوصلك وأقولها في وشك، هقولها ومش هخاف! تعليم فاشل".
وقالت رونيتا، "إزاى هنروح مدرسة من 8 الصبح وبعدها دروس طبعا لأن مفيش شرح لحد 6 و7 بليل ولسه مفروض نذاكر 5 6 ساعات ع الأقل.. تخلف!".
وأضاف عمر محمد، "يعني المدرس أصلا بيذل الى خلفونا بـ 4 درجات أعمال سنة في سنوات النقل تقوم إنت تديله 10 درجات في 3 ثانوي يا أخي".
وعلق محمود مجدي، "ثانوية عامة مش سنة تجرب فيها نظام! دي سنة المصير".
وكانت وزارة التعليم قد أعلنت رفع قيمة إعادة قيد الطلاب بعد فصلهم على خلفية استنفاد الغياب إلى 1000 جنيه بدلا من 10 جنيهات، وتخصيص 10 درجات للحضور والانضباط وتخصيص 30 درجة للقدرات.
