المصريون لليماني: «الكهربا قاطعة».. هند: «بكره وزير الكهرباء».. عبد الظاهر: «الظلام محاصرني من كل مكان».. زكريا: «الله يسامحك».. الصعيدي: «بطلوا كدب النور

سادت حالة من الغضب بين قراء «فيتو»، بعد أن طرحت استطلاع رأي حول تصريح المتحدث الرسمي باسم وزارة الكهرباء محمد اليماني والذي قال فيه "لا انقطاعات في التيار اليوم"، ما أثار حفيظة القراء فبادروا بالرد عليه مؤكدين انقطاع التيار، بالرغم من تصريحات المسئولين.

«الظلام محاصرني»
وقالت هند هنود: "لو في شخصين أنا بكرههم في حياتي هيكون أكيد واحد منهم وزير الكهربا.. أكيد".
وعلق عبد الظاهر مو: "لا ياراجل.. دنا الظلام محاصرني من كل مكان".
وأوضح صادق فريد الحلواني: "آه فعلًا الكهرباء مش بتقطع بس المياه هي اللي بتقطع من الصبح لحد بالليل بقالها 3 أيام من يوم الجمعة فعلا حسبي الله ونعم الوكيل في المسئول عن قطع مياه الشرب من الظهر وحتى منتصف الليل كل يوم".

«بطلوا كدب»
وأضاف زكريا السيد: "تصديقا لكلام الوزير أنا بكتب التعليق والكهرباء هربانة من البلد. الله يسامحك".
وقال الصعيدي أبو مؤمن: "بطلوا كدب بقى النور قاطع في إسكندرية المعمورة البلد من الصبح ولا هوه ضحك عالدقون والميه كمان".
وردت هند النبوي: "ياعم ده ناقص تقولولى لا انقطاع في الميا وإحنا اللى متهيألنا حاجات غريبة".
وقالت أماني جمال "أبدا ولا بتقطع أربع ساعات الصبح ولا حاجة أبدا إحنا ناس مفترية يا جدع".

«قاعدين في الحر»
وقال محمد حبو: "يا جماعة لازم الكابلات تستريح أومال تضرب فينا أحسن يعنى".
وأضاف إبراهيم الشورى: "إنت لما تروح جهة حكومية بقرار في جريدة.. الموظف يقولك ياعم دا كلام جرايد فهمتوا الموضوع".
وقالت فاتن علاء الدين: "حسبى الله النور قاطع بقاله 12 ساعة وقبلها بيوم من 11 لـ 3 وقبلها بيوم قطع طول النهار".
وأضاف محمد سالم: "أنا النور قاطع دلوقتي أهو وقاعدين في الحر".

«النور هيقطع»
ورد عمر المختار: "الكهرباء كانت قاطعة أكتر من ساعة في عز الحر ده".
وعلق هاني مهنا: "دا بتقطع بالـ٤ ساعات وأكتر من مرتين لتلاتة كل يوم. هوه شكله بيتكلم عن بيتهم وبيت وزيره".
وقال موكا موكا: "دة قطع قبل الظهر ٣ ساعات لما كنا هنفطس".
وأضاف مصطفى طه: "يبقي النور هيقطع".
ورد وليد عزت القلش: "فعلا هي مقطعتش غير ٤ مرات بس النهارده أقل مره ٣٠ دقيقة بيعجبني أوي شفافية الناس دي وصراحتهم المتناهية".