«ثقافة مصر محفوظة» قصيدة جديدة للشاعر أمين الديب

كتب الشاعر أمين الديب، قصيدة جديدة بعنوان «ثقافة مصر محفوظة»، اعتذارا لوزير الثقافة الدكتور عبدالواحد النبوى على عدم مشاركة وفد اتحاد الكتاب الذي التقى النبوى يوم الإثنين الماضى، لتأييد قراراته للنهوض بالثقافة المصرية بسبب ظروفه الصحية، قائلا:

اأحبائى...
أعزائى.. وحشتونى
ونفسى اطلب طلب منكم
وأرجوكم تسامحونى
مابينى وبينكوا ميت حاجز
وأنا عاجز
أمد إيدىًّ ناحيتكم
ولاقادر أكون منكم
ولاقادر أعدى الصعب.. والأهوال
ولا فاضل كلام تانى
ولا فاضل كلام ينقال
لأن الثورة مش ثورة
بقت فوضى في كل مجال
وحتى الصفوة والنخبة
ماهيش عاوزه وزير شغال
ولو كان للوزير رؤيا
يحاربه أهل وقف الحال
وحاجة يا خلق بتحير
وعقده.. عاوزه ميت حلال
وأنا تايه ومش عارف
أحدد يبقى مين غلطان
في وقت الناس بقت لايصة
وأتخنها تخين تعبان
وكله بينتقد كله
وفوضى وعنف م الإخوان
وأزهرنا وتعليمنا
وأعلامنا وثقافتنا
ما هيش قادرة
تحارب فكر كله ضلال
تحارب قعدة الكرسى
تحارب سرقة أو إهمال
تحارب نهب أموالنا وإهمالنا
في تصحيح الخطأ في الحال
وناس مش واخدة فرصتها
وناس صابرة على دا الحال
ولا شايف أراء عاقلة
ولاحكمة رجال عٌقًال
وإكمنى.. كبر سنى
ومش قادر أروح معكم... ولا اتبعكم
ولا اكتب كلمة في الجرنال
ولاقادر أفسر تانى وأحكيلكم
لأنى ياما قلتلكم
عن الخيبة وسوء الحال
وقلتلكم عن التعليم وخصخصته
وقتلكم عن الإعلام وخلبصته
وقلتلكم عن التثقيف وجعلصته
وقلت كتير بدون تفسير
عن الرشوة وعالسرقة وعالتزوير
وقلت كتير
ليه الفن انقلب حاله
وأمثاله من الكتاب
من اللى بيهبروا ولسه
بيخدونا لأمل كداب
وكان البعض بينافق
وناقص يلحس الأعتاب
وعاش خدام نظام فاسد
وحداية بتحمى غراب
وشايف بس مصلحته
عشان جايزة وطبع كتاب
ثقافة مصر ما تهمه
ومشانا وراه في سراب
وقبل الثورة كان صوته
كإنه فص ملح وداب
وبعد الثورة بيهرتل
كغنه حرك الثورة
وعاوز يتعمل له حساب
وأنا اللى مصرفى عيونى
وكل الخلق سمعونى
احذر واطرق الأبواب
واحث الكل عالثورة
واحارب فكر فيه إرهاب
رجال الأمن ضايقونى
وسجنونى بدون أسباب
وقلت كتير بدون تفسير وبالأسماء
عن العملاء.. وفيه وزراء
ومعظمهم من الدخلاء
شرحت ازاى
بيتعاونوا وبيساوموا مع الأعداء
لهدم الدين وثقافتنا
وتعليمنا ومبادئنا
وبيشكك في عروبتنا
وقصده يشق وحدتنا
وقلت ازاى نعيد للأمة أمجادها
بأبناءها..وأحفادها
وقلت ازاي نعيد الأمن
بعد ما غاب..
وديننا أصله دين وسطى
وأيها دين ما فيهش العنف والإرهاب
قفلتوا الباب
ولخبطوا العجين بتراب
ولا واحد سمع منى
ولا رأيي اتعمله حساب
وتسمع إن فيه أزمة
ومين مسئول عن الأزمة
وتصرخ لم تلاقى جواب
ولا واحد يقولك مين
وتقرا الجهل في عنيهم
وناس بكروش ومش فاهمين
هدفهم قعدة الكرسى
على المكتب منشيين
ولا يعرف يناقش أي متشدد
بإن الفن أصل الدين
وتترتب لهم جلسات
وبيسافروا لمؤتمرات
وياخدوا بالألوف بدلات
ويتخصص لها الملايين
وفى الأوبرا ما فيش
في الأوبرا غير عايدة
أساسها فن إيطاليين
ونسفوا الفن بغباهم
وقدامهم شباب دارسين
أصول الفن م الواقع
ولكن كلهم عاطلين
وسايبين أصل ثقافتنا
ونستورد فنون م الصين
ومش حاسين.. بأحوالنا
وفيه تبديد لأموالنا
وبيساعدوا في أعدائنا
تغِّيب وعى أبنائنا
وعالحال دابقالنا سنين
ولما وزير يكون شغال
ونفسه في ناس ومتعاونين
يلاقى الكل وقفوله
بناس تافهة ومنتفعين
ويتهموه تهم خايبة
بأنه كسر القوانين
ومش عارفين
بإن الثورة بتحاكم
نظام فاسد وأعوانه
وناس يتخدوا في الرجلين
لأن الثورة بالثورة 
بتلغى كافة القوانين
سواء صالح سواء طالح
رياح الثورة ماتفرق
ما بين لتنين
لكن بارجع ألوم نفسى
واستسلم لنار يأسى
وقول يا أمين
كلامك راح يفيد مع مين
دى حملة بجد مسعورة 
سلاحها الفن والكورة 
تقدم كل شيء هابط
بدون ضابط... بدون رابط
قبيح الأصل والصورة
وكتابنا وعلماءنا
وناس بالفتنة مبهورة
لضرب الدين
وواخدين الأمور سهلة
غلبت أقول
بلاش تاخدوا الأمور سهلة
يا خلق يا هووووووه
فئات م المجتمع جاهلة
وتتأثر قوام بيها
ومحتاجه نوعيها
نثقفها ونحميها
نعلمها القيم ترجع
لناس بتحب بعضيها
مافيش مسلم ونصرانى
ولا سلفى وإخوانى
نعلمهم كمصريين
بأن الدين
أساس بنيان لحضارتنا
وثقافتنا... هدفها تحمى عقيدتنا
ولا فيه دين يحارب دين
لأن الكل مصريين
ومتحدين ومش خايفين
على عيالنا ولو من مين
وألف يمين يا كتابنا يا وطنيين
أطمنكم ثقافة مصر محفوظة
ومحروسة ليوم الدين
بشرط نكونوا متعاونين
ولو حتى الوزير كان مين
وياما حاولوا محتلين
تتار أتراك فرنسيين
لكن بارجع وأقول يا أمين
تقوله لمين ؟؟
مادام النخبة مختلفين
غلبت أقول
ثقافة مصر تستوعب
ثقافة أي بنى أدمين
تهذبها تنقيها..
تطوعها لدنيا ودين
فأرجوكم
بلاش نعملها شغلانة
ونتحاور فريق واحد
ومش فريقين
وعاوزين الأمور تهدا
ونعلا لفوق بثقافتنا
وهاتوا إيديكوا في إيدينا
يا أهل الفن والإبداع
ياكتابنا يا وطنيين
نرجع مصر من تانى
لثقافتنا لحضارتنا
حضارة مصر معروفة
وأقدم م اليونان والصين
وباطلب م الوزير نبوى
يقدم أقصى ماف جهده
ويمشى بخطة مدروسة
ولا يهمه من الحاقدين
وسامحونى عشان تعبان
ومش محتاجة أتعكز
وحاكتب كل وقت وحين