الهجرة..!
هجرة..هجرة..هجرة..بقينا بنسمعها كتير وحلم شباب كتير مننا، عاوزين يهاجروا ويخرجوا برة البلد لأن البلد بقت مش عجباهم وﻻ حتى اللى فيها.. عاوزين يهاجروا عشان يبقوا حاجة تشرف ويرجعوا.. ده إذا رجعوا.. أصحاب ملايين.. أنا عن نفسى بقول ياترى لو كنت ولد ههاجر وﻻ.. بنسمع جملة البلد دى أحسن من غيرها.. مش عارفة إن كنا بنصبر نفسنا وﻻ هي دى الحقيقة فعلًا.
تسمع واحد يقولك أنا نفسى أهاجر وأسافر بره إن شاء الله أغسل صحون، طب ياعم لما أنت عاوز تغسل صحون طب ماتغسل في بلدك إيه اللى يخليك تكلف نفسك وتبعد عن أهلك، غاوى سفر يعنى.. وﻻ ماشى على رأي المثل إللى بيقول في السفر 7 فوائد ده إن كنت عارفهم.
ولما أنت عاوز تتمرمط وتشقى وتبدأ من الصفر طب ماتتعب في بلدك وابدأ من تحت الصفر على أقل هي أحسن من برة،، وﻻ هي دى عقدة الخواجة وبقت طبع فينا نحب اﻻستيراد.. والتصدير ملهوش معنى في قاموسنا، لو فعلا الهجرة والغربة هما الحل كان زمان البلد باللى فيها هاجرت وسابت البلد من بدرى حتى لو بطرق غير شرعية، بس أكيد في حلول إحنا مش واخدين بالنا منها أو يمكن عاملين نفسنا مش واخدين بالنا.
مشكلتنا إننا شعب مستعجل عاوز كل حاجة بسرعة في غمضة عين كل اللى بيحلم بيه يكون قدامه.. الواحد عاوز يتخرج يلاقي الشغل بمرتب مجزى وشقة وعربية ويا سلام بقى لو العروسة كمان وماله ياحبيبى أصل هو سلق بيض.
فيها إيه لو اشتغلت أي حاجة تساعد بيها نفسك وأهلك، تحس حتى إنك موجود ولو بعمل بسيط، أهو بدل ماتسافر تغسل الصحون..
إحنا محتاجين وقفة مع نفسنا صح.. محتاجين توعية لمفاهمينا ﻻزم نفهم أن مفيش حد بيطلع السلام من فوق ﻻزم يبدأها من تحت اﻷول، حتى لو كنت هتضطر وتبنى السلالم.. المهم أنك توصل وتلاقي البداية في فكرك.
