«مصروف البيت» يسيطر على حديث النساء بـ«فيس بوك»
بعد ارتفاع الأسعار وانخفاض المرتبات، أصبحت النساء في حيرة من أمرها في تنظيم وترتيب ميزانية المنزل، ولجأت بعض السيدات على صفحات موقع التواصل الاجتماعي «فيس بوك» لطلب المساعدة حول كيف تديرين بيتك بمبلغ أقل من 1500 جنيه في الشهر؟، وشاركتها النساء في تدبير المنزل وقدمن أفكارهن.
وقالت مريم: «بصي يا حبيبتى لو معاكى مصروف 1000 ج.. أنا قعدت فترة طويلة في دار مغتربات وعرفت بنات وعلشان كدا اتعلمت إزاي أقدر أعيش بأقل حاجة، والله الكلام إللي بقوله دا بجد: بصى في تونة بتتباع في السوبر ماركت الصغير اللي هو عادى مش هايبر يعنى الـ3 بعشرة جنيه وعلى فكرة مش وحشة هي كل الحكاية أنها مش سهلة الفتح يعنى أنتِ اللي هتفتحيها بالسكينة أو بالمفتاح بتاع السمنة كمان هي مفتتة مش قطع، بس طعمها مقبول ما هو كل واحدة بقى تعيش على قد الإمكانيات».
وأضافت: «ولو مش حابة دى يبقى فيه تونة اللي هي صن شاين بـ6 جنيه يعنى لو جيبتى من اللي هي بـ3 بعشرة هتجيبى بـ 20 جنيه 6 ولو جيبتى من الـ 6 جنيه هتجيبى 6 في 4 بـ 24 يعنى كل أسبوع واحدة.. اتفقنا؟».
وتابعت: «إحنا كنا بنروح نجيب من نجمة هليوبوليس في مصر الجديدة لأنى كنت ساكنة هناك، كنا بنروح نجيب الفرخة كيلو بـ 22 جنيه وكانت حلوة على فكرة والكيلو ونص بـ 28 يعنى أنتِ والبيبى وجوزك لو جيبتى فرخة ممكن تقعد معاكى 3 أيام يعنى هتجيبي 3 فرخات هتقضى معاكى 9 أيام، يبقى التونة 4 أيام في الشهر والفراخ 9 أيام فراخ في الشهر، أنتوا معايا؟».
وقالت: «يبقى التونة بـ 24 والفراخ بـ 66 يعنى 90 جنيها، حطى عليهم 10 شاى ليبتون، يبقى كده 100 يعنى لسه معاكي 900، هتجيبى كمان كيلو ونص لحمة، الكيلو اللحمة الفريش بـ75 جنيه يعنى الكيلو ونص بـ 148 ونص يعنى اعتبريهم بـ150 يبقى فاضل من المصروف 875 ناقص 150 بيساوي: 725».
وأضافت: «هاتي 2 لسان عصفور بـ 350 قرش وهاتى 5 مكرونة بـ 10 جنيه اللي هي الملكة دى وهاتى 5 صلصة يعنى 5 جنيه وهاتى علبة جبنة مثلثات كبيرة اللي هي 3 أدوار طعمة لأنها رخيصة شوية عن بريزيدون بكام بـ 8 جنيه، ماشي؟ يبقى كده باقى 27 جنيه ناقص 725 بيساوى 698، أوك؟».
وتابعت: «هتجيبي بقى كيلو عدس وكيلو فول، هتعملى العدس الأصفر دا 4 مرات في الشهر والفول مرتين على الغدا يبقى 24 يوم من الشهر، أنتوا فاهمين؟، هتروحى تجيبى طبق بيض بـ 28 جنيه أو بـ 30، يبقى الباقى 600 لأن أنا بشتريه كتير بـ 28».
وقالت: «ممكن تجيبى 3 كيلو سمك اللي هو بلطى أو ماكريل، هتعملي لكل واحد اتنين يعنى ولو ماكريل وكبيرة كفاية واحدة مع الأرز والسلطة الـ 3 كيلو دول كتير أصلا يعنى هتلاقي متوفر عندك أنتِ بقى وشطارتك يعنى 6 أيام كلهم سمك وكيلو الماكريل 15 والبلطى نفس السعر، حاولي تختارى الأماكن اللي مش غالية أوى تجيبى منها لأن فيه أماكن معينة بتبقى غالية».
وأضافت: «تجيبى بقى إزازتين زيت واحدة بعشرة وهاتى واحدة نضيفة شوية بـ15، يعنى 25 جنيه وهاتى 5 جنيه كيس سمن جنة اللي هو صغير ده يبقى 30 جنيه يبقى فاضل من المرتب 525 جنيه».
وتابعت:«هاتى بقى إزازة شامبو اسباركل بـ 20 جنيه و4 صابون بـ 12 جنيه كل أسبوع واحدة، وإزازة فيرى اللي هي الكيلو دى بـ 6 جنيه يبقى كده 38 جنيه ناقص 525 بيساوى 487 جنيه».
وقالت: «هاتى بقى كيلو ذرة فيشار بـ 7 جنيه لسه جايباه إمبارح وخليه عندك وهاتى علبتين كافي ميكس بـ 15 جنيه دايما عليه عرض بكدة، ولو مش عليه هيبقى زايد جنيه أو اتنين وهاتي 2 كيس سكر والله مش عارفة بكام الأيام دى قولى بـ 6 جنيه يبقى كله بـ 7+15+12 بيساوى 34 ناقص 453 يعنى فاضل من المرتب 453 معايا؟».
وأضافت: «لو جيبتي في الشهر كله كيلو ليمون بـ 10 جنيه الليمون رخص وبقى عادي، وإزازة خل ونعتبر أنك هتستعملى 3 كيلو طماطم و3 فلفل و3 خيار و2 جزر يبقى المجموع: كيلو الطماطم بـ 5 دى لو غالية يعنى 15 طماطم و15 خيار و20 فلفل؛ لأنه دايما غالى و2 جزر يعنى 15 برضه وإزازة الخل بـ 5 وسيبالكوا فيها جنيه ونص أهو ههههههههههههه يبقى المجموع 75 ناقص 352 بيساوى 277 معايا؟».
وتابعت: «بالنسبة للفاكهة والخضار هاتى بالنص كيلو مش عيب أنى أجيب نص تفاح مصرى عادى بـ 5 جنيه هيجوا 3 وآكلهم أنا وجوزى يوم فيه فاكهة ويوم لا، وبالنسبة للطماطم والفلفل وكده هاتي بالنص كيلو عشان هيبقى وصدقيني النص كيلو طماطم هيقعد معاكي يومين».
وقالت: «من الآخر يا بنات جوزك على قدك وعايزة تعيشي لازم ترضي وبلاش تطلعى للحاجات الأغلى، يعنى اعملى جدول وعلقيه على التلاجة وكل يوم شوفي هتطبخى أيه، ما هو لو أنتِ مشيتى البيت على 1000 جنيه يبقى دى برضه حاجة كويسة جدا، أنا بتكلم على الأكل والشرب لأنه بند كبير أوى في البيت».
