«ضفاير صبح العيد» قصيدة لمحمد حميدة
وما بين شريط الذكريات
حبة ملامح مبهجة
حبة حاجات
تشبك إدينا تشدنا
ترجع بنا
ييجي كام سنة
أيام ما كنا عيال صغار
نستنى فجر العيد يهل
يخضر ف قلوبنا النهار
نشبك خيوط الشمس من حضن السما
ونبل ريقنا بالفرح
كانوا البنات
جادلين ضفاير الصبح
ناقشين الكفوف
متزوقين لنهار جديد
طالل على كل البيوت
لابس جديد
فارش شوارعنا الغنا
بلالين كبيرة بقرش صاغ
كل العيال
فرحانة باللبس الجديد
وأنا كل تحويشة السنة
ييجي كام جنيه
أديتها لأخواتي البنات
علشان يروحوا يفصلوا
فستان جديد
وف كل عيد
أنا لسه فاكر دمعتك
لما تقولي دا المثل
"العين بصيرة والإيد قصيرة"
وانا كنت دايما بمتثل
للرغبة وأقعد ع السطوح
وأتفادى تريقة العيال
"إنت اللي لبسك مش جديد"
وف كل عيد
أنا لسه فاكر دعوتك
بتهز بيبان السما
فوق السحاب
وبشوفها تبكي لحرقتك
يا ست ست الطيبين
أنا لسه فاكر دعوتك
وبقوآمين
وبقول آمين.
