أبرز تعليقات النشطاء على نتيجة الثانوية العامة.. حسام: «الأول على الجمهورية كل سنة من الصعيد».. أسامة: «نص آباء مصر هيفطروا على ولادهم النهاردة».. محمود: «يعني إيه واحد يجيب 1
دشن نشطاء مواقع التواصل الاجتماعي، هاشتاج "نتيجة الثانوية العامة"، للتعليق على أبرز ملامح نتيجة الثانوية العامة هذا العام.
وقال محمد حسني: "بص أنا هحفظك كلمتين تقولهم لأبوك بعد النتيجة لحسن ممكن يخلي وشك مالوش ملامح نعرفك بيها".. وأضاف زايد الطمان: "نتيجة الثانوية العامة قضاء وقدر وحاجة بتاعة ربنا ملناش دعوة بيها".
حفظ المنهج
وتابع محمد المدبولي: "الأوائل كلهم بنات".. وقال خالد البلاسي: "جميع الأوائل في الشعبة الأدبية بنات.. البنات على استعداد يحفظو قاعدة بيانات مصر".. وقال عمر إمام: "في يوم النتيجة ده ييجي نص مليون بني آدم فرحو فيا".
وقال نادر الزهيري: "في نتائج الثانوية المتسربة لقيت واحد شايل 5 مواد بنسبة 26%، هو انت كنت ضيف شرف في الامتحانات ولا إيه يا دحيح؟" وأضاف ميدو محمد: "بالله عليكم يا جماعة يا أوائل بلاش كلام عايز أبقى مجدى يعقوب علشان الراجل نفسه زهق من الكلام ده".
وتابعت سلمى محمد: "٤٢ واحد أوائل علمي علوم ومنهم ٤ جايبين ١٠٠٪، ليه؟.. دكتور زويل دخل علوم بـ٨٢٪".. وقال محمد إبراهيم: "لو كل أب وأم عارفين مستوى ابنهم أو بنتهم الطبيعي مش هنلاقي كمية الحسرة اللي بنشوفها كل سنة".
وقال جرك هيمو: "كنت هجيب 93% وأبقى مهتم بالموضوع لولا الفرنساوي اللي هنقص فيه 9 أو 10 درجات، فأنا أشوفها ليه؟ بلاش أحسن".. وأضاف مصطفى البسيوني: "نتيجة الثانوية العامة في كل حال من الأحوال، لازم تبقى عارف إن ربنا معاك، وإنه له حكمة في أي حاجة هيوصلكو ليها.. بالتوفيق إن شاء الله".
طلاب الصعيد
وأكد حسام أحمد: "مش ملاحظين حاجة؟ كل سنة الأول على الجمهورية بيبقى من الصعيد".. وأضاف أحمد لوغاريتم: "الميزة الوحيدة لأوائل الجمهورية إنه ارتاح من الضغط العصبي بدري وده أحسن من رحلة السفر لأوربا أو الحوارات الصحفية".
وقال أحمد مسروجا: "والنبي يا بابا بلاش أشوف النتيجة بلاش بلاش".. وأضاف شرقاوي: "الدفعة كلها أوائل وﻻ إيه؟ كل دى ناس؟ 8 جايبين 100% والباقى 99.5%".. وتابع "جوكر ميج ابن الناس الكويسين": "السنة دى ممكن ميبقاش عيد فطر عشان الثانوية حيبقى عيد أضحى".
وأكد أسامة طراوى: "نص آباء مصر هيفطروا على ولادهم النهاردة".. وقال محمد العسكر: "ماما أنا جبت النتيجة بس خايف أوريهالك".. وأضاف محمود الرفاعي: "نتيجة الثانوية العامة اللى مجابش مجموع متزعلش والله محدش عارف الخير فين، لكن اللى جاب وزعلان ده مفيش سبب مقنع إنه يعيش للفطار والله".
وقال محمود سيد: "يعني إيه واحد يجيب 100%؟ ليه يعني؟ كاتب بالتشكيل سيادته، الواحد بيتشل، إحنا لازم نشكره ونتصور جنبه إنه قدر يقنع المصحح".. وأضاف أحمد إبراهيم: "جبت نتيجة الثانوية من الكنترول وجايب 82% وكنت متأكد من حلولي، وأما حسبتها كنت واثق إني أجيب 90-91%".
وأضاف بيتر الوزير: "أبويا كان بيبصلى وأسماء الأوائل بتتقال، لم أعلم أكانت نظرة أمل أم انتظار؟"
