الحلقة 23.. أحلام بكار.. حلقة رقم (23) سيدهم مرسى رضى المرشد عنه!!

اتصل بكار بحمزاوى الذى كان فى حالة ضيق ويفكر فى نفس اللحظة بالاتصال ببكار
حمزاوى: أنا كنت لسه حطلبك حالًا ازيك يابكار
بكار: أنا بخير بس متضايق شوية وقلت لو تحب
حمزاوى: أحب
بكار: مش تعرف الأول أنا حقولك ايه؟
حمزاوى: عارف أنت عاوز تقابلنى وأنا نفس الشيء عاوز أقابلك كمان ساعة فى الحرافيش أول شارع فيصل
بكار: فيصل مش زحمة؟
حمزاوى: أول فيصل سهل الخروج منه ماتقلقش
بكار: اتفقنا
__ والتقيا بعد ساعة فى مقهى الحرافيش __
حمزاوى: ايه اللى مضايقك؟
بكار: تقريبا نفس اللى مضايقك موضوع إدارة موقع فيس بوك
حمزاوى: إزاى الإدارة توافق على غلق الصفحة؟ إزاى؟
بكار:  صفحة آسفين ياريس عدد أعضائها تعدى المليون يعنى بقى وضعها مقلق وغير كده داعمة لمبارك ومعادية للأخونة عايزهم يسيبوها؟ دول لازم يقفلوها وخصوصا أن الإخوان مابطلوش إرسال شكاوى وتقارير لإدارة الموقع بشأنها ده غير تدخل الكبار فى الموضوع كان لازم يحصل كده
حمزاوى: اللى بتقوله ده معناه خطير معنى كده أن بكرة كل واحد فينا حيعادى الإخوان على صفحته أو حيكتب مساوئهم وتروح شكاوى من الإخوان لإدارة الموقع بسبب اللى مكتوب فى صفحة أى حد فينا أنه ينتظر أن صفحته تتقفل
بكار: ماهى دى ديمقراطية الإخوان
حمزاوى: دى فاشية واستبداد زى ما قال البرادعى عنهم
بكار: البرادعى عاقل وحكيم وعنده بعد نظر مش تور الله فى برسيمه زى ناس تانيه
حمزاوى: قد ايه كنا حنبقى بلد راق لو كان البرادعى رشح نفسه لرئاسة الجمهورية وكنا وقفنا وراه وكسبناه
بكار: احنا مش وش نعمه احنا وش مرسى وخيرت الشاطر والعريان والبلتاجى والجوقة دى كلها
حمزاوى: كده الواحد يخاف من بكرة فى ظل حكم الإخوان
بكار: بكره ايه يا حمزاوى من النهاردة ده الصح وعين العقل
حمزاوى: أنت شوفت عملوا إيه مع سالى السيد هاشم
بكار: شوفت رفدوها من المدرسة علشان قالت كلمة حق
حمزاوى: البنت دى شجاعة وتستاهل جايزة وقصيدة حس ياريس اللى اتسببت فى الأزمة دى المفروض كل الجرايد تنشرها وكمان كل المواقع.
بكار: علشان الناس تصدق أن وزارة التربية والتعليم اتأخونت
حمزاوى: هى وزارة التربية والتعليم بس هى اللى اتأخونت؟ ما وزارات كتير برضه اتأخونت دى سياسة الإخوان
بكار: الإخوان عاوزين يحطوا أيدهم على كل حاجة فى البلد وعينهم على المحليات
حمزاوى: عينهم على البلد كلها يابكار بس ذنب البنت إيه؟
بكار: ذنبها أنها هجت مرسى
حمزاوى: هى هجت مرسى ولا سيدنا مرسى ؟
بكار : هجت سيدهم مرسى رضى المرشد عنه
حمزاوى : صح كلامك عندك ألف حق هو فعلا سيدهم البلد باظت
بكار : ولسه حتبوظ كمان وكمان طول ما العنيد المتكبر ده قاعد فيها
حمزاوى : انت مش واخد بالك ام كلثوم بتغنى
بكار : خلاص كفاية كلام عن مرسى وتعالى نسمع اللى أحسن منه
حمزاوى: دى مش أحسن منه هو بس دى أحسن من الإخوان كلهم
بكار: على قولك أم كلثوم أحسن منهم لأنها بسطت الشعب المصرى مش نكدت عليه عيشته زى الإخوان
حمزاوى: سحلب ولا قرفه
بكار : كفايه قرفه انا حشرب سحلب
حمزاوى: وأنا كمان سحلب
وراحا يشربان سحلبهما ويستمعان إلى الست أم كلثوم وهى تغنى أغنيتها الرائعة للصبر حدود