كنباوى وكنباوية.. حلقة رقم (23) .. طول لسان الواد ابن الريس مرسى !

كنباوية تسير فى الشقه تدندن: وأنا عاملة نفسى نايمة، وأنا عاملة نفسى نايمة، وأنا عاملة نفسى نايمة يسمعها كنباوى فيبتسم ثم يضحك ويبادرها بالقول.
كنباوى: إيه ياكنباوية أنتى علقتى؟ ولا الشريط سف؟ ولا عجباكى الأغنيه دى؟ ولا بتتريقى عليا؟
كنباوية: لاعلقت ولا الشريط سف ولا حاجة من اللى أنت قلته خالص أنا بتريق على الواد السيس مرسى
كنباوى: وماله الحيلة ده كمان؟ عمل إيه؟
كنباوية: عمله أسود ومهبب ومنيل عليه وعلى اللى يتشددله
كنباوى: خلصى ياكنباوية وقولى من الآخر الواد ده ننوس عين أمه عمل إيه؟
كنباوية: الواد ده تعبان فى دماغه مضروب فى مخه عنه تلات تربع ضاربين على الآخر الواد عمر ده عنده صفحة على الفيس بوك من يوم ما أبوه بقى رئيس وهو عمال يهرتل فيها ويشتم الناس
كنباوى: معقولة ابن الريس يعمل كده؟ لأ انتى اكيد بتتجنى عليه علشان انتى مابتحبيش مرسى ابوه
كنباوية: أنت يا راجل تعرف عنى كده؟ أنا وش كده؟ كل الحكاية أن الواد ده متفرعن وقليل الأدب ولسانه طويل حبتين وطالع فيها زى مايكون أبوه رئيس بجد.
كنباوى: أمال أبوه إايه ياكنباوية؟
كنباوية: أبوه منظر، ميس، برفان، ديكور، أبوه رئيس صندوق، أبوه رئيس على ماتفرج هو نسى أن أبوه أيام مبارك كان فى الحبس حبسجى يعنى ورد سجون الواد باين عليه نسى.
كنباوى: ماهم بيقولوا فى ردهم على حكاية حبسه دى أن سيدنا يوسف اتحبس وطلع من حبسه حكم مصر.
كنباوية: ايش جاب لجاب هى حصلت يشبهوا سيدنا يوسف بمرسى؟ ده جنان رسمى وتخلف عقلى الناس دى يا اما عبط يا بتستعبط.
كنباوى: دول قالوا كمان أنه من أيام وعهد الصحابه وانه ولى من الأوليا وإنه بركة من عند رسول الله.

كنباوية: يتوكسوا البعدا بركة إيه ده غراب نوحى بومة خراب ده الدنيا خربت من يوم ماهو مسك الحكم والعقارات وقعت والقطارات ولعت واتقلبت والثوار ماتوا واتقتلوا والسياحة انضربت والبورصة كل مدى فى النازل والاحتياطى النقدى قرب يطير وبقينا مديونين لطوب الارض والسلع أسعارها بقت نار والناس بقت تسرق بعض ومش لاقيه تاكل العيش الحاف والبنزين الناس بتموت بعض عليه فى محطات البنزين وبقى يتباع سوق سوده ورغيف العيش بقى لاحول ولاقوه الا بالله لايسر عدو ولا حبيب والناس بقت كارهه بعض ومش طايقه بعض اقول ايه ولا ايه ياكنباوى ماتفتحنيش اكتر من كده انا مبقوقه من مرسى وأهله وعشيرته سبنى فى حالى أنا زهقانه على الآخر من الناس دول.
كنباوى: ياه ده زى مايكون دمل واتفقع خراج وطرشق كل ده واجعك ياكنباوية؟ ده على كده انتى حملك تقيل واحنا مش داريين.
كنباوية: اسكت ياكنباوى ده انا بضحك معاكم واتساير من غلبى مش عايزه اشيلكم الهم معايا واخرتها الواد ابن مرسى يشتم الناس ويسب الست لميس الحديدى
كنباوى: مش الست مميس دى الست العصبية المنفسنة مرات الراجل المذيع الأقرع ده بتاع وده فله شمعه منوره ؟ هى دى ؟
كنباوية: ايوه ياخويا هى دى ما انت ناصح اهه
كنباوى: وانتى مزعله نفسك عليها ليه ماهى تقدر ترد عليه ماهى بترد على طوب الارض وتعرف تاخد حقها منه تالت ومتلت هى منفيس دى محتاجه حد يدافع عنها دى زى البربنط فى الرد ولا هى علشان حرمه زيك محموقه عليها لو كانت رأجل واتشتم كنتى حتزعلى برضه كده وتتحمقى حمقتك دى ؟
كنباوية: ماهو شتم كمان يوسف الحسينى
كنباوى: ماهو بينى وبينك يوسف ده معرضها أوى وفاتح صدره جامد
كنباوية: ولو ياكنباوى ماتوصلش للشتيمة وقلة القيمة وطولة اللسان وقلة الأدب
كنباوى: الواد الخربوء ده شتم حد تانى ؟
كنباوية: شتم ياخويا كل المصريين اللى مش من الإخوان المسلمين وقال عليهم شوية خرفان
كنباوى: الواد ده ناقص رباية معنى كده أنه شتمنى وشتمك وشتم المصريين كلهم الواد ده عايز يتربى من أول وجديد الواد ده أبوه ماعرفش يربيه
كنباوى:هو أبوه بيعرف يعمل حاجة خالص علشان تنتظر منه أنه يربى الواد ده
كنباوى: على قولك ياكنباوية الواد ده اسمه إيه؟
كنباوية: اسمه قطع اسمه اسمه عمر
كنباوى: طيب أنا رغم كل اللى انتى قلتيه ده مافهمتش إيه حكايه الأغنية اللى أنتى دايره فى الشقه بتغنيها وبتعيدى وبتزيدى فيها دى؟
كنباوية: وأنا عامله نفسى نايمة دى الأغنية اللى الواد قالها على الإعلام المصرى بتاعنا بيتريق عليه بيها.
كنباوى: هى حصلت كمان يشتم الإعلام ؟
كنباوية: الواد طايح فى البلد كلها شتيمة ماحدش مالى عينه وحاسس أن مفيش حد قده
كنباوى: كان غيره أشطر هو مش عارف فين جمال وعلاء دلوقتى؟
كنباوية: جمال وعلاء مين؟ إيش جاب لجاب جمال وعلاء دول أدب وأخلاق وأبوهم عرف يربيهم مش الواد ناقص الرباية ده
كنباوى: ربنا يفك سجنهم
كنباوية: يسمع منك ربنا ياكنباوى
كنباوى: إيه أخبار الأكل؟ فيه ولا مفيش؟
كنباوية: ولو مفيش اقطعلك حتة من لحمى ياغالى
كنباوى: تسلميلى ياغالية ويسلملى لحمك لحمك ده انا عايزه فى حاجه تانية مش للأكل
كنباوية: أنت تؤمر وتقشر أنا وكلى ولحمى تحت أمرك بس أنت تقول
كنباوى: حقول وحياتك حقول بس أروق دماغى الأول آكل واشرب كوباية شاى وبعد كده حقولك أحلى قواله
كنباوى: أحبك يامدلعنى
كنباوية: وأنا بموت فيكى ياكنباوية