«شاومينج بيغشش ثانوية عامة» يدشن مبادرة للامتناع عن تسريب الامتحانات

وضع مدير صفحة "شاومينج بيغشش ثانوية عامة"، من خلال صفحته على موقع التواصل الاجتماعي "فيس بوك"، عددًا من الطلبات أمام المسئولين، كي يمتنع عن تسريب الامتحانات، وبدأ حديثه قائلًا: "أحيانًا لازم نلاعبهم بطريقتهم عشان نوصلهم صوتنا".

وأضاف: "شاومينج عايز حاجات بسيطة، وهي تصحيح مسار المنظومة التعليمية عن طريق.. المدرس ياخد حقه.. مفيش حاجة اسمها مرتبات ملاليم.. المدرس ده اللى بيربي ناس بكره هتشيل البلد ع كتافها.. قولى إيه هيا حقوق المدرس في مصر؟!!.. ولا حاجة.. المدرس ياخد وضعه الاجتماعي والمادي والثقافي.. دور المدرس موش أقل من دور الطبيب أو المهندس".

وتابع: "إلغوا التصنيف الطبقي للكليات.. بناءً على إيه بتقول كليات قمة!!.. آه صح نسيت بناءً ع التنسيق، طب.. هندسة.. صيدلة = قمة، تربية.. تجارة.. آداب.. رياض أطفال = ولا حاجة، طب موش تربية ده اللى بيطلع مدرسين.. مدرسين اللى هما علموا الطلبة وبقت مهندسين.. رياض أطفال.. موش ده بيعرف فن التعامل مع الأطفال وتربيتهم.. الطفل بيتربى ع أسس علمية صحيحة.. الطفل بيكبر بيبقا إنسان سوى.. بردو موش كليات قمة!!".

وقال خلال بيانه على صفحته بموقع التواصل الاجتماعي "فيس بوك": "بيتصرف كام ع طباعة الكتب!! يعني إيه أدرس فـ كتاب الحاسب الآلى "ويندوز 98"!! يعني ايه أدخل كليات ألاقيهم شغالين بأدوات وقوانين عفا عليها الزمن!! يعني إيه لسه الامتحان عندي على ورق ومدرس يتكدر جنبهم يصححهم!! لما تجيب تابلت وتعمل شبكة وايرليس مقفولة ع مواقع التعليم والدروس بس.. تابلت مقفول للتعليم بس.. ليه امتحانات ع الورق.. أفكار التطوير كتير لكن إحنا فـ التطور شغالين بمبدأ «هذا ما وجدنا عليه آبائنا»".

واختتم بيانه، قائلًا: "أوعدكم كلكم بإني هختفى تمامًا للأبد.. وكـمبادرة مني كـ"شاومينج " ودليل ع صدقي وحسن نيتي.. موش هنزل أي امتحانات أو إجابات في يوم 14 يونيو ودي امتحانات " ‫#‏الفيزياء‬ و‫#ال‏فلسفة_والمنطق‬".. بس ع الأقل يُطرح ع الرأى العام إن الحاجات دى هتتنفذ وجاري دراستها..والإعلان ع كده في موعد أقصاه 15 يونيو".