«هشام قاسم» يوجه 3 نصائح لـ«السيسي» عند قيامه بجولات خارجية

قدم الناشر هشام قاسم، ثلاث نصائح للرئيس عبد الفتاح السيسي عند قيامه بزيارات خارجية في المرة القادمة، مطالبًا الرئيس بعدم اصطحاب وفد من الفنانين أو الكتاب ورؤساء منظمات حقوق الإنسان، والاكتفاء بالفريق الرئاسي، وذلك بسبب الصور والفيديوهات التي ظهرت في مؤتمر الرئيس مع المستشارة الألمانية ميركل.

وكتب هشام قاسم تدوينة على فيس بوك: "ثلاث نصائح للسيسي في زياراته الدولية القادمة. أول نصيحة: طبعا ما يخدش حد معاه تاني، لا فنانين ولا كتاب ولا رؤساء منظمات حقوق إنسان، ولا وفود من أي نوع، ويكتفي بالفريق الرئاسي، مش علشان النتيجة كانت سلبية في زيارة ألمانيا ولكن لأن الصور والفيديوهات بتظهر واحد في الوفد على ما اعتقد صحفي، وكان بيزعق في البنت الطالبة اللي تحايلت ودخلت المؤتمر الصحفي وبيقولها "شت يور ماوس"، وحاول يهجم عليها ولولا ستر ربنا وتحجيز الأمن الألماني، كان ضربها وكان حيبقى منظر".

وأضاف: "وكذلك من الواضح أن الإخوان بيبعتوا ناس تشتبك مع الوفود المصاحبة، زي ما شوفنا في زيارة نيويورك وبرلين، ومع كل العدوانية اللي اتعاملوا بيها، المسائل كانت ممكن تتطور وتحصل اشتباكات و"البونيات" على "الشلاليت والروسيات" تشتغل ودي حيكون مرجوعها سيء للغاية على الزيارة".

وقال قاسم: "وكمان مش لازم يعمل حساب قوي للمظاهرات المعادية، لأن ما فيش رئيس جمهورية لها أهمية على الساحة الدولية إلا وبيلاقي مظاهرات معادية مستنياه وأولهم الرئيس الأمريكي وعمر ما بيكون للمظاهرات دي وزن أكتر من لقطة أو جملتين في أي تغطية، لكن لو حصلت اشتباكات، حتاخد مساحة أكبر من كده.".

وذكر: "أما النصيحة الثانية" الحاجة التانية إنه لازم يتدرب شوية على ما يعرف بلغة الجسد وأول حاجة هي عدم الإشارة للشخص عند مخاطبته، يعني لما كان بيكلم ميركل وبيشاور عليها بصباعه فدي في الغرب بتعتبر شكل من أشكال التعنيف لا تتماشى مع الأعراف ولا حتى مع طبيعته وصورته الشخصية المهذبة وكذلك لازم يتجنب كلام من نوع "إنتي لازم تفهمي" ولكم أن تتخيلوا لو هي كانت قالت له "إنت لازم تفهم" وقعدت تشاور عليه بصباعها، طبعا كان الإعلام بتاعنا سحب النبابيت على الست ميركل والدنيا خربت، وكان من الأفضل إنه يقول "وأرجو أن تتفهمي" وبكده يوصل نفس المعنى ولكن بشكل أفضل".

وتابع: "النصيحة الثالثة وفقًا لما قاله هشام قاسم" وأخيرا، يبطل يلبس نظارة شمس. لا يوجد رؤساء جمهورية في أي حته برة المنطقة بتاعتنا بيلبسوا نظارات شمس. وأخر رؤساء جمهورية كانوا بيلبسوا نظارات شمس كانوا الجنرلات الانقلابيين بتوع أمريكا الاتينية، وبالتالى مردودها عليه وحش قوي. والنصيحة دي مش بس للسفريات ولكن لأي ظهور عام حتى في مصر، ولو نازل زيارات ميدانية في الصيف والشمس قوية وعينيه بتتعب يبقى يلبس نضارة عدساتها فاتحة، والشمبر بتاعها خفيف، بحيث إن معالم الوش تبقى ظاهرة وربنا يجعل كلامنا خفيف على مجاذيب السيسي".