بالفيديو والصور.. أطفال بولاق الدكرور يسبحون في مياه الصرف.. «على»: « المنطقة عايمة على بركة مياه».. «نور»: «لا نرى المسئولين إلا أيام الانتخابات».. «وخالد

مع دخول فصل الصيف اعتاد عدد كبير من الأسر المصرية، على الخروج للمناطق الشاطئية للأستجمام والجلوس على شواطئ البحر، لكن الوضع مختلف جدًا بمنطقة بولاق الدكرور فالمياه متوفرة بالشوارع، وأمام الجميع ولكنها مياه الصرف الصحي، حولها الأطفال إلى ما يشبه حمامات السباحة؛ لتظهر مدى معاناة سكان المنطقة وسط غياب تام لدور المسئولين.

رصدت عدسة"فيتو" ماسأة أهالي منطقة بولاق الدكرور الغارقة في مياه الصرف الصحي.

عائمين على بركة مياه
قال علي محمد، أحد أهالي منطقة بولاق الدكرور: «إن المنطقة عائمة على بركة مياه من الصرف الصحي، وأغلقت القمامة أغلب شوارعها في ظل غياب تام لمسئولي المحافظة والأحياء، والناموس والقوارض انتشر في المنازل بسبب تراكم مياه الصرف الراكدة والقمامة».

بورتو للأطفال
وأضاف: «الأطفال عندنا بينزلوا يلعبون في المياه مع الكلاب، عاملينها زي حمامات السباحة بتاع شرم الشيخ والغردقة، وفيه عدد كبير منهم الكلاب الضالة عضتهم، وياريت المسئولين يبصوا بعين الرحمة للأطفال دي قبل ما المرضى يطلع روحهم للي خالقها».

صراع الانتخابات
وأكد نور سيد، أن منطقة بولاق الدكرور لا تعرف المسئولين إلا في الانتخابات البرلمانية، حيث يتسارع كل مرشح مع منافسية للحصول على أصوات المواطنين قائلا: «في أيام الانتخابات بلاقي كل يوم مرشحين وثلاثة نزلوا المنطقة، ده يجيب عربيات يشيل الزبالة، والتاني يجيب عربيات تسحب مياه الصرف الصحي، وثالث ينزل يشوف مشاكل الناس ويقعد في وسطيهم ويحلها، ويصلح بين ده وده، لحد ما فترة الانتخابات تخلص، وبعديها كأنهم مايعرفوش المنطقة ولا سمعوا عنها، كل ده علشان المنطقة فيها أكتر من 2مليون صوت، ينجحوا أي حد».

نشكر المسئولين على الإهمال
وتابع محمد خالد ساخرًا: «أنا بصراحة عايز أشكر السادة المسئولين على اهتمامهم بالناس، احنا الحمد لله عايشين زي الفل، مياه الصرف بتدخل علينا البيوت، وإن مدخلتش مش بنعرف ندخل بيوتنا من الريحة، وولادنا على طول مرضى من المياه والحشرات، بصراحة مش ناقصنا حاجة، طيب مش عايزين يبصوا للناس يبصوا لبيت ربنا اللي المياه بتدخله على طول، الناس تصلي فيه إزاي».