ما أعظمك يا الله
سبحان الله خالق الكون.. إحساسنا وإحنا صغيرين كنا عايزين نفرح وبس وبنفكر في نفسنا وناسيين المستقبل..عايشين الحاضر ومطمنين في حضن أبونا وأمنا بشقاوتنا ودلعنا عليهم بنتعبهم من غير قصد وبعد شوية لما ندخل مرحلة الشباب بنبتدي نفكر في أحلامنا وطموحاتنا لنفسنا مش لحد تاني.. مش في دماغنا أو تفكيرنا أي مسئولية وكل همنا نحقق حلمنا ونكون صداقات جديدة.. وهات يا بابا عشان أشتري أو أخرج مع أصحابي وبنفرح باللمة والهيصة والجنان وبنضحك من قلبنا.
بعد كام سنة نتخرج من الجامعة ونبتدي نشوف هنعمل إيه لمستقبلنا واللي يشتغل في حاجة بيحبها واللي بيلاقي أي شغل والسلام واللي مابيلاقيش شغل ويحبط أو برضة يشتغل ويحبط..حاجات كتير مختلفة.. ونحب ونبقى عايزين نتجوز ونختار صح أو غلط كله نصيب وبرضة أبونا وأمنا شايلين المسئولية بحب.. يفرحوا لفرحنا ويزعلوا لزعلنا لغاية ما نخلف وتبقي حياتنا هي نفس حياة أبونا وأمنا.
كل هدفنا نسعد أولادنا وقلبنا يوجعنا عشانهم وعيونا تدمع من فرحهم ونبقي خايفين من بكرة عشانهم ونشتغل على قد مانقدر عشان نوفر لهم احتياجاتهم وكل ساعة بندعي ربنا يحرسهم ويوفقهم ويبعد عنهم كل شر واللي يحاول يقرب منهم ناكله.
وشعارنا "إلا عيالنا" وما نبقاش عايزين من الدنيا غير سلامتهم ونجاحهم وسعادتهم حتى لو قصاد ده حياتنا سبحان الله الحياة عبارة عن مشاعر بتنقل من سن لسن ومن حالة لحالة ومن حب لحب لغاية ما نبقى زى بابا وماما بالظبط.. ما أعظمك يا الله..
