بالصور.. أطرف كوارث نشطاء «فيس بوك».. أمنية: «أكلت صحابي ساندوتشات كريم على أنها جبنة برازيلي».. دينا: «غسلت الخلاط ففرقع في وش ماما».. آية: «عملت سباق للسمك بره الم

تذكر رواد مواقع التواصل الاجتماعى مصائبهم التي قاموا بها بعيدا عن أعين الكثيرين، وأخفوها عبر السنين ليرووها عبر إحدى صفحات "فيس بوك".

مدخلتش الامتحانات عشان عاوزة أنام
قالت مي:" مدخلتش امتحانات أولى جامعة كل ما أصحي للامتحان أكون عاوزة أنام أقول والله ما أنا رايحة ومدخلتش ولا امتحان، عيدت السنة والمصيبة أني عملت كدا السنة التانية واتحولت لجامعة تانية عشان سقطت مرتين".

وأضافت سماح:" تيتا كانت مربية طيور وأنا وأختي الصغيرة كنا بنلعب فقولنا نعدهم ابتدينا نجري وراهم ونمسك واحدة واحدة ونحطهم في علبة كبيرة ومقفولة بغطا وعليها طوبة كبيرة لغاية ما حطينا 13 واحدة في العلبة وقافلنا عليهم وماما نادت علينا عشان نشترى طلبات نزلنا احنا الاتنين وسبنا الفراخ مقفول عليهم وماتوا كلهم ومن ساعتها محرم دخولي دوليا، دخلت طب بيطري عشان أصلح غلطتي".

ولعنا في البلد وإحنا بنشوى درة
وروي مصطفى:" كنا قاعدين انا وأصحابي وكنا بنشوي درة المهم بعد ماخلصنا شوي روحنا أنا وأصحابي عند واحد صاحبي ناكل الدرة وبعدها بساعة لاقينا البلد كلها مقلوبة وبيندهوا في الجوامع والميكروفونات حريق في البلد، والناس كانت بتجري علشان تطفي الحريقة كانت كبيرة قوي واحنا طلعنا نطفي معاهم والمطافي جت وكان يوم ولا فيلم نهاية العالم، وفي الآخر اتضح ليا أنا وأصحابي إن احنا نسينا الفحم مولع، ولحد الآن ربك حليم ستار".

اختراع كتاب العلوم
وتذكر محمود:"عملت اختراع كده كان في كتاب العلوم وجبت مسمارا وربط فيه سلكين ودخلتهم في المشترك وعينك ماتشوف غير النور قطعت الكهرباء عن المنطقة كلها، بس انا كويس".
وقالت هاجر:" كنت في المدرسة وبفتح الشباك، لقيت مدرس أول بيفتح باب الفصل وبيقول مين اللي بيحدف حاجات من الشباك وكسر ازاز العربية تحت لقيت الفصل كله بيشاور عليا وبيقول هاجر".

أكلت صحابى ساندوتشات كريم
وأضافت أمنية: "أكلت 7 أصحابي سندوتشات كريم دوف على أنها جبنة برازيلي وبعد ماكلوها اعترفتلهم، بس الحمد الله كلوها كلها قبل ما أقول بس الأغرب أن في واحدة منهم قالتلي انتى حطه معطر في الجبنة دي، ياعيني غلبانة".

وروي طارق:" أبويا كان معاه مشاكل مع شركة الكهربا عشان ورقة كدا تثبت ملكية البيت لجدي المهم خلص الورقة وجيه حطها فوق التليفزيون وهي كانت مليانة مربعات مربعات وأنا صغير عدت اخدتها وجبت الألوان ولونت المربعات كل لون مختلف وكتبت اسمي واسامي أصحابي، شوية وسألت أمي لو عملت كذا كذا في الورقة يحصل ايه قالتلي هتتقتل، رجعت رشيت مايه على الورقة على أساس أنها تنضف، وابويا اللي جيه نفضني".

غسلت الخلاط كله فرقع في وش ماما
وقال محمد:" أنا أبويا بيركن العربية في منزل كده بتاع مخزن، فمرة وأنا صغير إداني المفتاح وكان عايزني أجيب حاجة منها، أنا نزلت وجبت الحاجة ولعبت في العربية شوية، ورحت منزل فرامل اليد وقافل العربية وطلعت اديتله الحاجة ونزلت وقفت مع صحابي فكنا ساندين على العربية وسخنا شوية بقه فقعدنا نطبل عليها وكدة، وإذ فجأتا الاقيلك العربية بتنزل لوحدها وأنا أنزل أجري وراها أحاول أوقفها وعينك متشوف إلا النور من الخبطة في باب المخزن شنطة العربية، دخلت عند الكنبة وأنا أروح فين واجي منين بقة وهعملها على روحي، الأقيلك ابويا نازل بقه....+18 ".

وأضافت دينا:" مرة كنت بعمل عصير وحطيت السكر وكل حاجة ونسيت المعلقة جوه الخلاط وقفلت وشغلت لقيت صوت رهيب وغطا الخلاط طار والعصير كله طرطش في المطبخ وعلى السقف، وطبعا مش عايزة احكيلكوا مسحت آثار الجريمة بسرعة ومن خيبي غسلت الخلاط كله بالموتور تحت الميه قبل ما ماما تخرج من الحمام، ولما طلعت قالتلي كان في صوت غريب قوي قلتلها لا ماتقلقيش ده خلاط مش عارفه ماله فاجت ماما تشغله فرقع في وشها".

سباق السمك
وتذكرت آية:" كان عندنا حوض سمك واحنا صغيرين، واخويا كان ليه سمكة باسمه، قولتله تعالى نعمل سباق بينهم طلعناهم برا الحوض وهما بيتحركوا وأنا أقوله أنا اللي سبقت مكناش نعرف أنهم بيطلعوا في الروح، فجأة وقفوا فاقولتلوا خلاص نرجعهم الحوض لقيتهم مش بيعوموا قولتله أكيد بيرتاحوا من السباق".