بالفيديو.. «حجاجوفيتش»: مرتب الحلاق في الدنمارك 35 ألف جنيه.. سعر الحلاقة للرجل 260 جنيها وللكلب بـ575.. غسيل الشعر بـ65 جنيها.. الدراسة في كلية «موضة وقص شعر الكلاب» شرط العمل بقس
أكد أحمد حجاجوفيتش، الرحالة المصري، أن أكثر من 95% من الحلاقين في الدنمارك من الشباب، ومرتب الحلاق هناك يتراوح من 23 إلى 35 ألف جنيه مصري.
جاء ذلك خلال حلقات برنامج "سفاري حجاجوفيتش" على قناة "أون تي في".
وكتب حجاجوفيتش تدوينة على "فيس بوك" قال فيها: "هل تعلم أن أكتر من ٩٥٪ من الحلاقين في الدنمارك ستات وشابات، وأن الدنمارك تحتاج الآن كثيرا من الرجال والشباب من جميع أنحاء العالم للعمل كحلاقين والمرتبات شهرية بتتراوح بين ٢٠ ألف كرونة (٢٣ ألف جنيه مصري) و٣٠ ألف كرونة (٣٥ ألف جنيه مصري)، بس مافيش حاجة هناك اسمها بقشيش".
ارتفاع المرتبات
أما عن سبب المرتبات المرتفعة للحلاقة في الدنمارك فيقول حجاجوفيتش: "ناس كتيرة حتسأل ليه المرتبات عالية كده، والسبب ببساطة شديدة إن أسعار الحلاقة في الدنمارك: الأطفال من يوم إلى ٥ سنوات ١٢٥ كرونة (١٥٠ جنيها)، الأطفال من ٦ سنوات إلى ١١ سنة ١٨٠ كرونة (٢١٠ جنيهات)، الستات ٢٤٠ كرونة (٢٧٥ جنيها)، والرجالة ٢٣٠ كرونة (٢٦٠ جنيها)، وكبار السن فوق ٦٥ سنة ٢٠٥ كرونة (٢٣٥ جنيها)".
أما عن القصات الخاصة فيقول حجاجوفيتش: "قص الأصة بس (للرجال والستات والأطفال وكبار السن) بـ٧٥ كرونة (٨٥ جنيها)، حلاقة دقن بـ ١٥٠ كرونة (١٧٥ جنيها مصريا)".
أما الأمر الأكثر غرابة فيقول عنه حجاجوفيتش:"الأغرب من الأسعار دي كلها إن لو حد عايز يغسل شعره بس قبل الحلاقة لازم يدفع ٥٥ كرونة (٦٥ جنيها) زيادة وبعدين تروح تغسل شعرك في البيت، ولو عايز تغسل شعرك قبل وبعد الحلاقة وتنشف شعرك كمان بالسشوار بتدفع الكومبو ٣١٥ كرونة (٣٥٠ جنيها)".
وأضاف حجاجوفيتش: " كل ده لأن الحلاقين بنات وستات، الحاجة الغريبة قوي اللي لازم حتلفت نظر أي حد حيروح الدنمارك، إن كل الكلاب هناك حالقة شعرها بموضات غريبة وعجيبة جدًا ولا يمكن تلاقي حد مش حالق شعر كلبه على أحدث صيحات الموضة... وده عشان عندهم مثل مشهور بيقول:نضافة كلبك من نضافتك".
كلية موضة الكلاب
و الحاجة العجيبة هناك، حسبما قال حجاجوفيتش:" إن أي حد عايز يشتغل حلاق كلاب لازم يدخل كلية موضة وقص شعر الكلاب، ويدرس فيها ٣ سنين ويتخرج منها بعد امتحانات عملي ونظري وبعدين ممكن يبتدي يشتغل في الشغلانة دي، ولكن الأفضل إن اللي عايز زباين كتير لازم يكمل دراسته وياخد ماسترز ودكتوراه في قص شعر الكلاب".
وأضاف حجاجوفيتش:"بس الموضوع يستاهل التعب بصراحة لأن أرخص قصة للكلب بتكون بـ٥٠٠ كرونة (٥٧٥ جنيها) ده غير إن قص ضوافرهم بـ٦٠ كرونة (٧٥ جنيها) والمساج للكلب بعد الحلاقة بـ٨٥ كرونة (١١٠ جنيهات)".
واختتم حجاجوفيتش كلامه قائلًا:" من الآخر مفيش أحلي ولا أشطر ولا أجدع من الحلاقين في مصر، هما ٢٥ جنيها حلاقة وغسيل وسخن وساقع وليمون وشاي وقهوة ومساج".
