"فيتو كافيه" تنفرد: نتيجة الاستفتاء "نعم" بنسبة 100.6% .. بعد التحسين

 "اللجان التى تعدت نسبة التصويت فيها لـ"نعم" نسبة الـ100% كان بسبب نظام التحسين الذى اتبعته بعض اللجان على غرار الثانوية العامة القديمة، خبر تناقله شباب "فيس بوك"؛ لتفسير ظاهرة الـ 100% التى تحدث لأول مرة فى الانتخابات، والتى أكد الشباب أن نظام التحسين هو السبب، تزوير المبتدئين الذى سخر منه الشباب كان سببًا فى انضمامهم إلى صفحة "أنا آسف يا ريس" بضمير مرتاح، "فيتو كافيه" رصدت تعليقات الشباب ..
أحمد العراقي: مرسى مطروح.. لجنة السلوم 100% نعم.. لجنة حتوش 100% نعم.. لجنة البقبق 100% نعم.. الله يرحم الحزب الوطنى كان برنس تزوير، إنما دلوقتى التزوير "لم".
السيد أبو عبية: مين الحيوان اللى طلع إشاعة إن مرسى مطروح 100% نعم؟ النتيجة 99.9% نعم .. 0.1% أصوات باطلة.
100 % نعم!! هى اسمها مَرسىَ مطروح ولا مُرسي مطروح.
على العوضى: كده أقدر أعمل لايك لبيدج أنا آسف يا ريس وأنا ضميري مرتاح.
محمد السلامونى: النتيجة النهائية للاستفتاء.. فوز مدرسة عاشور.
مينا محروس: نتيجة التصويت فى المنوفية.. 12% نعم.. 18% لأ.. 70% أحمد شفيق.
ريهام متولى: بس بصراحة أنا مش متفاجئ من اكتساح نعم للدستور.. أنا متفاجئ من الناس المتفاجئة من اكتساح نعم.
أحمد صالح: الله يرحم الحزب الوطنى كانوا برنسات في التزوير... حتى التزوير فاشلين فيه.
سيد العمرى: الغلطة غلطت الناس اللى حطت آمالها على أكتر محافظة أساسا بتؤول دايما إنها تبقى ضد الثورة واللى ييجى منها.
محمد بركة: نتيجة الاستفتاء نعم بنسبة 100.6% بعد التحسين.
محمد يونس: فاكرين أيام استفتاء 19 مارس لمّا الناس كانوا بيصوّروا صباعهم "البمبى"؟ ويقولوا عليه صباع الحريّة! كنا ساذجين أوى يا خال!
محمد أبو العينين: لاحظت وشوش أغلب الناس النهاردة أثناء التصويت كانت يائسة، سواء قالوا نعم أو لا، الناس زهقت وجابت آخرها فعلا خلاص من صراعات النُّخب!
السيد سعيد: مرسى جاب مجموع زى الزفت فى انتخابات الرئاسة 51 %، ف قرر يشد حيله ويظبط نفسه فى الاستفتاء، وجاب 99,9 % .. نهضة دى ولا مش نهضة؟