شوية لخبطة فـ«حَالي»

مَالك؟
مالى!!
حساكى مخنوقة
لا شوية لخبطة فـ"حَالى"
طيب احكى!
ضحكِتى مَسروقة!
عندك اخوات؟
3 بنات
بتحبى؟
أكيد
مين؟
واحد في خيالى
وأخبار الشعر؟!
مفيش جديد
آه صح فَريدة وآدم
مين دول؟ 
دول عيالى
طب وأصحاب؟
طلعوا سَراب
بعدوا من غير أسباب
يا ســـتى كبرى
أقولك اقعدى هنا فـ"البلاتوه"
وهجيبلك حـتـــة جاتــوه
يا محمد يا فتحية الشاى هاتوه
متتعبيش نفسك
مش عايزة حاجة
انتي باردة كده ليه؟
آه أعصابى تلاجة
طب هو رجعلك؟!
وقت ما ببعد
وبعدين؟
دايما يوعد
طب ما هو سابك؟
عادى فـ"داهية"
طيب اسمه؟؟
تصدقى ساهية!!
لسه بتحبيه؟
آه هنكر ليه
للدرجة دى؟ 
حب مهوش عادى
طب وهو!!
دايما يرفعلى الحاجب
فـ"داهية" إن كان مش عاجب
شكله كان حلو؟
أنا حبيته عشان روحه
وعجبنى فيه طموحه
وتفسيرك إيه من صمته؟
حبة خوف على كرامته
طب والناس؟
واخدة منها جَنب
ليه كده؟
بقيت بحس بالذنب
احكيلى بالملّى! سمعاكى
مفيش حاجة بتحصلّى
يادوب أنام وببص شوية لقدام
وبحس بقلق بيوصلى
فبعدها باقوم أصلى
أعملك قهوة؟
ياريت تكون سادة
وهاتيلى الأفلام المتعادة
أنا طولت في الكلام!
لا ولا يهمك يلا سلام.