"حاجات صُغيّرة أو ضد هوايا وألوانى" شعر "مسعود شومان"
ضد هوايا
ها اختار بنفسى
بإيدى دى
الوردة اللى تناسب روحها
وتليق مع كرانيش فستانها
عارف
عشقها للشمس
وللألوان السُّخنة
عشان كدا هاختار لها قبرها
ضد هوايا وألوانى
حرية
بس
بنام على حس الحواديت ...
اللى واكلها الدود والعتة
بس
مطبوع على روحنا صفار الورق المهزوم
بس
هافضل هنا
فى العشة دى
اللى احتفلت فيها لوحدى
بحرية جسمى وسط أزايز البيرة
وبس
أصول الخديعة
المدينة اللى اتبسمت ليَّا
مع إنى الواد اللى كفوفه
ما مسكتش الشوكة
ولاّعرفت رجله الفِوَطْ الأفرنجى
المدينة اللى ضحكت بعنف
على روحى اللى ماتت
على أول باب عرِّت لى بزازها قدامه
وفهمتنى أصول الخديعة
ومعنى الابتسام
جنب الهيلتون
حاتبتسم قوى
لعلب الورنيش
اللى بتترقص جنبها الجزم
ولأزايز الزيت الفاضية
اللى نايمة على وش السلة الحديد
وحاتبتسم قوى
على روحك
اللى فى مرة شوفتها
بتزك فى الخرابة اللى جنب الهيلتون
مع إنى عربجى
عربجى
أيوه
فى إيديه السرج
وتحت منه شوال
وبيعرف فرسه لمَّا بتحرن
حافضل كدا
على عربيتى الكارو
سارح فى العفونة
وِفشْل الحمير
لدرجة خلتنى
أعرف الحمار الطيب
من البنى آدم الطيب
