أبين زين وأضرب الودع
أبين زين.. وأقول على المستخبى واللى مش معروف.. أضرب في ودعى.. وتملّى بادعى.. والمستخبى باقوله ع المكشوف.
محتاج تغيير من سنه واتنين.. أنا كل نظام أسمع لكلام.. يشرحلي الصدر يسر العين.. لكن في الواقع عندى حاجات.. بتحير عقلى وفكرى ساعات.. لو قلت عليها حقول حكايات.. وسمعنا كتير من مستويات.. ع الكرسى سنين توعد بحاجات.. ويمر الوقت دون دلالات.. عن إنجاز واعى بكل ثبات.. لكن التعليم محتاج تغيير.. يشمل بذكاء كل المجالات.. طالب ومعلم ومعاونين.. في إدارة جريئة وفنيين.. دارسين لمناهج ولقوانين.. عارفين رغبات كل الملايين.. يبقى التعليم بنظامه أمين.. مع كل الناس وبدون تفخيم.. في خطب لوزير وبدون تعميم.. عايزين تنفيذ مدروس وسليم.. ومحاسبة لكل خبيث ولئيم.. وكفاية بقى هدم وترميم.. العلم أساس كل النجاحات.. وطريق للنهضه وللبطولات.. وبدون العلم نكون أشتات.. ونصيحة لكل الناس بالذات.. أرجوكم مش عايزين تصاريح.. عايزين تنفيذ منقذ وصريح.. وبدون فذلكة وبدون تلميح.. التعليم عايز نهج صحيح.. والعلم مجاله كبير وفسيح.. أنا نفسى كلامى يكون مسموع.. وأشوف تنفيذه كتاب مطبوع.. ومعلم رأسه لفوق مرفوع.. ومناهج فيها العلم شموع.. ويا رب يكون فيه ناس سامعين.. لكلامى وللمشكلة عايشين.. ويكونوا دارسين ويكونوا عارفين.. من غير تعليم حنكون ضايعين.. وأنا قلت كتير خليكو شاهدين.
