بالصور.. حالة «طلاق» بسبب «طقم كاسات».. الزوج كسره فردت الزوجة بتحطيم «لاب توب».. ونشطاء «فيس بوك» يعلقون.. «خالد»: «حنطها في النيش واتجوز عليها&

تداول نشطاء على مواقع التواصل الاجتماعي قصة طلاق زوجة بسبب طقم كاسات، بعد أن نشر أحد الأزواج قصته على إحدى صفحات المشاكل الزوجية، وقال إن زوجته تحب «النيش» أكثر من أى شيء آخر.

ويحكى الزوج قصته قائلا: "الله يحرق النيش بجاز، مراتى اتهبلت وعقلها طار منه، النيش عندنا من الممنوعات ،المشكلة إنى غلطت فى البخارى وجالى ناس صحابى وطلعت طقم كاسات من النيش اتكعبلت على وشى والكاسات انكسرت، راحت مراتى صوتت وكسرت اللاب توب بتاع الشغل، رحت رميت عليها يمين الطلاق، حد يقولى اتصرف إزاى معاها".

وسخر رواد موقع التواصل من تصرفات الزوجة من خلال تعليقاتهم التي نرصدها في السطور الآتية.

«حنطها في النيش واتجوز عليها»
قالت سوما: "كنت خش كسرلها بقية الحاجات اللي في النيش كان هيجلها جلطة وتموت وترتاح منها"، بينما علق خالد حسن قائلا: "ده أنا لو منك هحطها مكان النيش واتجوز عليها وأجيب مراتى التانية وأقولها بصى دي مراتى الأولانية حنطتها فى النيش فخلى بالك بقى".

«مش لاقيين حتة ننام فيها»
وتابع يوسف هانى: "أنا مرة كان عندنا ضيوف وأمي قالتلي ناولني طقم الكوبيات الطويلة اللي في أول رف والنيش طويل شويه فوقفت على كرسي وبجيب الطقم راح واقع منه كوباية لاقيت أخويا الصغير طالع من الأوضة وبيقولي أمك هتنيشك من الضحك سيبت الكوبيات كلها وقعت في الأرض ومن ساعتها مش لاقيين حتة ننام فيها".

وقال وليد: "بتفكرني بأمي كل ما ألمس حاجة في الشقة تعملي فيها الأمين العام للأمم المتحدة وتعلن استياءها بالشبشب، النهارده شايلة من تحت سريري 22 كوباية قالتلي أنت بتجهز نفسك يا ابن القرعة فضتلي النيش، سبتها ورحت ألبس لبست فردة الشراب وقعدت ساعة أدور على الفردة التانية وفي الآخر اكتشفت أني ﻻبس اﻻتنين في رجل واحدة، ربنا يسامحك يا حاجة".

«يمين وشمال»
محمد أسامة: «تكسر لاب توب أبل علشان طقم كاسات، دى يترمي عليها يمين وشمال».