ماذا قالت الحيوانات لزوار الحديقة في شم النسيم؟.. الأسد: اللي يقرب من مراتي هنفخه.. الببغاء: بلاش استظراف منك له

في عملية تبادل الأدوار بين الطرفين، وضع بعض مستخدمي موقع التواصل الاجتماعي «فيس بوك»، أنفسهم مكان بعض الحيوانات والطيور الذين تعرضوا لمضايقات من جانب زوار حديقة الحيوانات بمناسبة شم النسيم.

القرود

تقمص «محسن الشيخ» دور القرود والنسانيس، وكتب على صفحته: «كل يوم فول سوداني وترمس وموز.. ارحمونا شوية.. بطننا اتنفخت.. قال إيه وعاوزنا نتنطط قدامكو.. خلوا عندكوا دم شوية.. مافيش مرة تدخلوا علينا بحلة محشي، أو ورك فرخة أو حتة لحمة».

الزرافة

وجسد «أشرف كمال» دور ذكر الزرافة وكتب: «السادة الزوار.. أنا في فترة حداد على حبي الأول والأخير الزرافة روكا اللي ماتت من كام شهر.. يعني مش هسمح لأي بنت تعاكس أو تحاول تجر رجلي عشان أتصور معاها».

الأسد

وتقمص بعض المستخدمين لـ«الفيس» دور الأسد، وجاء أطرف تعليق في بوست «ناصر سعيد»: «العب بعيد ياض إنت وهو وهي.. اللي يقرب من مراتي هنفخه.. كله إلا المدام».

الببغاء

أما الببغاء أو «البغبغان»، فقد جسده «أحمد خالد»، وكتب مخاطبًا الزائرين: «وحياة أبوك يا شيخ بلاش استظراف وتطلب مني أردد كلمات وجمل مش حافظها.. أنا كل اللي طلعت بيه من الدنيا جملتين تلاتة.. بقولك إيه أنت وهي «أبوك السقا مات».

الفيل

وتقمص «إيهاب قنديل» دور الفيل وكتب: «ارحموا عزيز قوم ذل.. أنا ابن ناس والله.. ومش حمار عشان كل شوية واحد ييجي يركب ويتنطط على ضهري وفاكر نفسه راكب توك توك».