«ح الناحية التانية».. قصيدة لجلال البحيرى

ح الناحية التانية
م التلتوار
تباشير أنسان
ح يعيش مش مرغم
ولأول مرة ح يرفض
القهوة المرة
ده لأنه .. بيحب السكر
..
ح الناحية التانية
م التلتوار
أتوبيس بعساكر
ولأول مرة
من غير نبابيت
ح يعدوا بصمت
وحيقلع توبه
ويكون عريان
وح يرقص ملط
ويقطع كل الأوراق المختومة
ويقصقص جناحات النسر الكمشان
يتخلص من كل هوية
لا بتشبه حلمه
ولا حتى جيوبه
ولا خفة دمه
و مزاجه المتقلب دايما
ولا تجرى ف دمه و شريانه التاجى
......
وده كله
ح الناحية التانية م التلتوار