أبين زين وأضرب الودع

أبين زين.. وأقول على المستخبى واللى مش معروف.. أضرب في ودعى.. وتمللى بادعى.. والمستخبى باقوله ع المكشوف

فيه قضية محيراني.. كل يوم تقلب ميزاني.. إحنا ليه ماسكين بنادق ضد بعض بشكل تاني..
ليه بنضرب ليه بنهرب ليه بنحمى كل جاني..من يقول أقتل ودمر باسم دين لله أناني..
الودع بيقول عالمنا في مهب الريح رماني.. والحروب باسم الحضارة تبقى فوضى ألعباني..
فاقبلوا منى النصيحة الجميع عايش يعاني.. والحروب في كل دولة أصبحت مثل الأغاني..
فيه مؤامرة صدقونى من رياسة أمريكاني.. والعرب فاتحين بلادهم للى قاصى واللى داني..
والخطب في كل لحظة بالحماس تقلب كياني.. يا عرب فيه وحدة ممكن بالصمود تعدل ميزاني..
فتحوا عينيكم وشوفوا إيه جرى يوم للياباني.. لما دكوا هيروشيما بالقنابل في «ثواني»..
فكروا في مرة واحدة كنت «مصرى أو سوداني».. التوحد بين شعوبنا فيه أماني..
والحروب بين أهل سوريا والعراقى واليماني.. كلها تخطيط مدبر هدفه عدوانى استيطاني..
قلتوا إيه لو كان عرابى أو صلاح الدين مكاني.. كان صرخ فيكم وحرك الشعوب ضد اللى جاني..
فاقبلوا منى النصيحة.. كل خاين وطنه فاني.