بالصور.. أطرف شائعات النشطاء على مؤسس «فيس بوك».. خلود: «مارك اتقدملى وأنا رفضته».. مروة: «هيكتبلى جوجل باسمى».. مصطفى: «منوفى».. محمد: «تاجر شنط».. و

انطلق منذ أيام "هاشتاج" اجتاح مواقع التواصل الاجتماعى بعنوان "طلع شائعة على صاحب تويتر"، وفي إطار ذلك ومع اتجاه البعض لابتكار كذبة جديدة لتكون "كذبة أبريل"، عرضت إحدى صفحات مواقع التواصل الاجتماعى اقتراحًا آخر بتحويل الأمر على "صاحب فيس بوك" "مارك" بهشتاج "طلع شائعة على مارك"، فجاءت "الشائعات" كالتالى.

"أخته اسمها ماركة بس مش مسجلة"
قالت حسناء: "مارك أخته اسمها ماركة بس مش مسجلة"، وعلق فادي ساخرا: "والإشاعة اللي عاوزها على مارك عادية ولا رنين مغناطيسي".

"مارك اتقدملى وأنا رفضته"
وأضاف عبدالجواد: "مارك إخوان"، وردت خلود ضاحكة: "مارك اتقدملي وانا رفضت عشان ابن خالتي الظابط المهندس الدكتور".

"منوفى"
وكتب مصطفى: "مارك منوفي"، وأضاف عبدالله: "مارك ده أصلا كان طفلا مصريا، وعلشان ذكي لما كبر اكتشفوه وسافر وغير الجنسية".

"تاجر شنطة"
وكتب محمد: "مارك.. زمان كانوا بيستعملوه في القهاوي وعند بتوع العصير، وبعدين راح إعارة السعودية وربنا فتح عليه هناك وبقى تاجر شنطة، وبعدين ضرب فيزا لأمريكا واشتغل في قطع غيار الكمبيوتر، حب بت من هناك أبوها مرضيش وهي اللي فتحتله الفيس بوك ده يسترزق منه لحد ما ربنا كرمه وفتحها في وشه".

وقال مصطفى: "كان عاوزني أخترع له زرار DisLike بس أبويا ندهلي وقالي لا".

"قعدة المصطبة"
وعلق سميح ساخرًا: "أصلا مارك خد فكرة الفيس من المصريين، لما زار مصر 1991 وشاف قعدت المصاطب مع كوباية الشاي السخنة في ليالي الشتاء الحارة، ودخل مصلحة حكومية وشاف الموظف المصري وهو سايب شغله وقاعد يلت ويعجن في حوار بنت اخته اللي رفعت قضية خلع على عريسها اللي هو قريبهم من بعيد، ولما راح مارك فرح شاف البنات وهما كل همهم يطلعوا القطط الفطسانة في فستان العروسة وطرحتها، ومن هنا كان للمصريين السبق في التواصل الاجتماعي، يبقي انت أكيد في ماااسر".

"هو اللى أكل الجبنة"
وذكرت إيمي إشاعتها:"مارك بيدور على عروسة مصرية، لكل بنت ترغب بالزواج تقديم السي في بتاعها على مركز إدارة الفيس بوك"، وعلق أحمد ساخرا: "هو اللي أكل الجبنة".

"بيحبنى وهيكتبلى جوجل باسمى"
وكتب محمد: "مارك كان بيبيع حاجات بالقسط"، وعلقت مروة "بيحبني وهيكتبلي جوجل باسمي".

وعلق شادي قائلا: "مارك ظابط مخابرات مصري اسمه الحقيقي رأفت الهجان"، وكتبت حنان: "مارك حفي ورايا عشان معجب بيا هو أصلا كان معايا في تجارة المنصورة بس ربنا فتح عليه ونساني بقي".

"بيجيب الفول مارك"
وعلق محمد: "مارك ده كان أشطر واحد في المدرسة كان على طول بيجيب فووول مارك"، وقالت بسمة ساخرة "مارك سارق فكرة الفيس بوك من عيل دحيح بتقويم ونضارة كعب كوباية".

وعلقت أمنية: "مارك كان ماشي مع البت نورة جنزير في المنتزة"، وقالت سمر ساخرة: "مارك بيلم أنابيب يا جماعة".