بالفيديو.. «فيتو» تستطلع آراء المواطنين حول إضافة السجائر لـ«التموين».. «نور»: «هتبقى مصلحة بس أمي هتبدلها بأي حاجة».. «محمد»: «هي نازلة من زمان&

طالبت رابطة تجار السجائر بالقاهرة والجيزة، المهندس إبراهيم محلب، رئيس مجلس الوزراء، بالتغلب على فشل السيطرة على المنافذ الجمركية التي يهرب من خلالها السجائر المغشوشة ومجهولة المصدر، وذلك بإلزام وزير التموين بصرف حصة شهرية من السجائر على البطاقة التموينية التي يستفيد منها أسر 40 مليون مواطن من محدودي الدخل.

رصدت عدسة "فيتو" آراء المواطنين حول إضافة السجائر كسلعة تموينية على البطاقات.

"هتبقي مصلحة"
قال نور سيد: «لو ضافوها هتبقي مصلحة، بس الست اللي في البيت هتاخد منها ولا لأ، أنا أمي لو خيروها بين السجاير وأي سلعة تانية هتبدلها بسكر»، فيما قال محمد على أحد صاحبي أكشاك بيع السجائر: «هما لسه بيطالبوا أنها تنزل على التموين، ما هي نازلة من زمان، وكل يوم حملات بتنزل تشرف علينا، واللي بيلاقوه مخالف بيخدوا على القسم، ومن ساعة ما خدوا القرار ده، وأنا حالى واقف، حاطين للبياع جنيه ونصف في الخرطوشة، المفروض أقل حاجة خمسة جنيهات، ولو حطوا ظابط تموين جنب كل بياع مش هيبيع بالثمن اللي بيقولوا عليه».

يدوني كيلو سكر
وأضاف على ماهر: «بدل ما يحطوا السجائر على التموين يدونا كيلو سكر، ولا كيلو أرز، ولا زجاجة زيت، بيحطولنا سم مع الأكل، طيب يحطولنا الغاز اللي مش لاقيينه، ولا الأنبوبة اللي بندوخ عليها، والعيش إللي مش لاقيينه، يرخصوا الأكل للغلابة، كده عايزين الشعب كله يشرب سجائر».

مش هاخد التموين
وتابع ضياء محمد: «أنا بشرب سجائر، ولو حطوها على البطاقة مش هاخدها، أنا نفسي أبطلها، يقوموا يخلوها على التموين»، فيما قال مصطفى محمود «أنا بقالي 35 سنة بشربها، ولو حطوها على التموين مش هناخده أصلًا، السكر والشاي والأرز هيبقي كله ريحته سجائر، يعني أكلنا هيبقي كله ريحته سجائر».