أبين زين وأضرب الودع

أبين زين.. وأقول على المستخبى واللى مش معروف.. أضرب في ودعى.. وتمللى بادعى.. والمستخبى باقوله ع المكشوف

الرمل قال للودع فيه ناس ومش فاهمين.. إن السياسة كياسة تحكم الملايين..فيها الذكى والغبى وفيها ناس عارفين..رايحين لفين أينما كانوا بدون تخمين..وعندهم وعى ضد الجهل والخاينين..مش زى ناس بالجزيرة في العسل نايمين.. مفكرين أنهم يصطادوا بالتخوين.. وليل نهار طبالين زى القرود قاعدين.. يطبلوا ويرقصوا ويقبضوا شاكرين..لكن أسود السياسة ترفض التلوين..لهم طريقهم وعارفين القرود راجعين....يقفوا أمام الأسود ويعلنوا آسفين.. إحنا فهمنا غلط سامحونا معتذرين.. لكن بساعة الحساب فيه للحساب قوانين..وكل واحد ياخد حقه بكل يقين.. فطبلوا وزمروا يا جماعة منشقين..أنتم في لحظة غرور بالوهم منفعلين..
لكن حساب الشعوب مش سهل للساقطين..وبالتاريخ ألف عبرة وعبرة للمجانين..ففكروا ألف مرة ومرة يا فاشلين..إن الشعوب صبرها في آخرته سكاكين..تقطع رقاب كل خاين أو عميل في كمين.. وأنا قلت كل اللى عندى من سنين وسنين.. وصدقونى في لحظة حترجعوا نادمين.
وتعرفوا حجمكم وسط البنى آدمين..وكل مجنون يفكر هو رايح فين..حكم الشعوب مش تجارة ولعبة للفاضيين..اتعلموا وافهموا تكونوا ملتزمين..وجعتوا راسى مفيش فايدة في ناس تايهين..وناس كتير زيهم تاجروا باسم الدين.