أبين زين واضرب الودع
أبين زين.. وأقول على المستخبى واللى مش معروف.. أضرب في ودعى.. وتمللى بادعى.. والمستخبى باقوله ع المكشوف
مجرد سؤال بدون انفعال.. وسهل ويسير ما فيش فيه جدال.. حضرة رئيس الوزارة نفسنا تفسير.. ليه كل حبة تشيلوا وزير.. تجيبوا وزير.. وبعد شهرين تلاثة تعلنوا تطوير.. وتعينوا من جديد بدل الوزير.. ولكل تغيير نلاقى عندكم تبرير.. وخطط كتيرة بنسمع عنها في التحضير.. غيرت ليه الوزارة؟
قول بدون محاذير.. ونفسى أسأل سؤال حير فؤادى كتير.. وأعرف إجابة بدون اللف والتصبير.. كان فيه وزير للثقافة وزارة التنوير.. قدم في يوم استقالته لظرف صحى عسير.. عينته ليه مرة تانية في الوزارة وزير.. ولنفس نفس الوزارة.. لأنه شخص قدير.. وبعد كام شهر غيرته بدون تفسير.. إيه السبب قول لنا شيء يقنع الجماهير.. لأن موقع وزير موقع مهم مثير.. ويهمنا كلنا نعرف ليه التغيير.. إحنا بدأنا الطريق بفكر ثورى منير.. ونفسنا نستقر بشكل علمى كبير.. بخطة واضحة ومرسومة لها تباشير.. لأن حكم الشعوب له فلسفة وتنوير.. محتاج عزيمة ورؤية ثابتة للتعمير.. وأنا قلت كل اللى عندى ونفسى أسمع خير.. وأشوف وزارتك بترفع مصر م الأعاصير.. وتبنى أبراج لأحلامنا إليها نطير.. فقلت إيه يارئيس وزرائنا وانت خبير.. وربنا معاك وقادر يرفع التعسير.. وسامحنى لو كان عتابى فيه عشم وكبير.. لأننا كلنا بنحب مصر كتير.. وهدفنا تصبح لنا جنة بها أساطير.
