أبين زين وأضرب الودع
أبين زين.. وأقول على المستخبى واللى مش معروف.. أضرب في ودعى.. وتملى بدعى.. والمستخبى بقوله ع المكشوف.
حضرة وزير داخلية مصر رأيك إيه في اللي بيحصل وشايفه م الألف للييه.. لحد إمتى نطبطب ع اللي أجرم ليه؟.. اللي بيزرع عبوة يتنسف اللي حاميه.. هي البلد ناقصة؟..
اضرب ضربة اقضي عليه.. والكل واقف معاك في الحق لا يخفيه.. فقول بقى للجماعة يختشوا حبة.. وعيب قوي باسم دين الله يتاجر فيه.. أصحاب مصالح هدفهم كل شيء نلغيه.. والكل يسمع كلامهم مهما كان بلاويه.. فقل لهم مهما طال الوقت يا معاتيه.. الشعب فاهم وصاحي للعبكم وواعيه.. ليه تقتل الأبرياء بدون سبب تبديه.. وليه مواطن مسالم بالنيران تكويه.. هي البطولة في غدر بناس تفاخر بيه.. إنت تاريخك طويل في القتل والا ناسيه.. لكن نهاية الطريق حتكون بما لا تعيه.. والمفتري ربنا في جهنَمه يرميه.. وكل واحد ضحية يلعن المعاتيه.. ومصر عارفة العدو أما الصديق تحميه.. فقل لنا يا وزيرنا إحنا نعمل إيه؟..
في أي واحد بيحرق كل من يجافيه.. علشان برفض يكون في صفه أو معاديه.. الناس مفيش عندها فيه أي شىء تداريه.. والشعب جاهز لأي نداء وطن يفديه.. ونفسه في يوم يشوف تنكيل بمن يبكيه.. وكل شيء له نهاية والمثل قال إيه ؟..
اللي يرشك بميه رشه بنار تكويه.. وأنا قلت كل اللي عندي وإنت فكر فيه.
